కీచకులారా ! ఓ కిరాతకులారా !

దుష్టులారా ! ఓ దుర్మార్గులారా !

రక్తందాహం తీరని 

ఓ రాక్షసులారా ! రాబందులారా !

చాటుమాటుగా కాలసర్పాలై కాటువేసే 

ఓ కామాంధులారా ! కామ పిశాచులారా !

అక్కలంటూనే  చెల్లెల్లంటూనే

అమ్మలంటూనే  స్త్రీ జాతిని దేవతలంటూనే

కళ్ళుపొరలు కమ్మితే చిత్రహింసలకు గురిచేసి

కౄరంగా... ఘోరాతి ఘోరంగా...అతినీచంగా

ప్రేమ పేరుతో కామదాహం తీర్చుకునే

ఓ అంధుల్లారా ! కామాంధుల్లారా ! 

వస్తున్నాం వస్తున్నా ! త్వరలో వస్తున్నాం !

మీ కళ్ళళ్ళో త్రిశూలాలు గ్రుచ్చి మీ గుండెల్ని చీల్చి

తీరని మా రక్తదాహం‌ తీర్చుకుంటాం !

పుడతాం పుడతాం !మళ్ళీ పుడతాం మీ భరతం పడతాం!

వస్తున్నాం వస్తున్నా ! త్వరలో వస్తున్నాం !

చూస్తాం చూస్తాం ! సహనంతో వేచి చూస్తాం !

మా శీలానికి మా సహనానికే అగ్నిపరీక్ష పెడితే 

కోస్తాం  కోస్తాం ! మీ పీకలు కోస్తాం !

మీ నాలుకలు కోస్తాం ! మీ ఊపిరి తీస్తాం !

వస్తున్నాం వస్తున్నా ! త్వరలో వస్తున్నాం !

వేస్తాం  వేస్తాం ! గండ్రగొడ్డళ్ళతో వేటు వేస్తాం !

తీస్తాం  తీస్తాం ! లోతుగా గోతులు తీస్తాం !

చేస్తాం  చేస్తాం  ! సామూహికంగా మిమ్మల్ని సమాధి చేస్తాం!

పుడతాం పుడతాం ! మళ్ళీ పుడతాం మీ భరతం పడతాం !

వస్తున్నాం వస్తున్నా ! త్వరలో వస్తున్నాం !

వేస్తాం వేస్తాం ! మీ నేరాలనుండి

మీ ఘోరాలనుండి మీ దుర్మార్గాలనుండి

మీ దుస్కృత్యాల నుండి మీరు బయటపడి

తప్పించుకునే అన్ని దారుల్ని మూసివేస్తాం !

వస్తున్నాం వస్తున్నా ! త్వరలో వస్తున్నాం !

మీ కలల్లో కలకత్తా కాళికలమై !

మీ కంటిలో కారమై ! మీ కాలిలో ముళ్ళులమై !

మీ పక్కలో బల్లెమై ! మీ గుండెల్లో గునపాలమై !

మహంకాళులమై ! భద్రకాళులమై ! కనకదుర్గలమై !

మీపాలిట శతృవులమై ! మీముంగిట మృత్యుదేవతలమై !

పుడతాం పుడతాం ! మళ్ళీ పుడతాం మీ భరతం పడతాం!

ఇంతకీ మేమెవరో తెలుసా? మొన్న మీ కామాగ్నిజ్వాలలకి

నిర్దాక్షిణ్యంగా బలైన ...కాలి... బూడిదైపోయిన...నిర్భయ

దిశ...ఆయేషా...ప్రత్యూషా...ప్రియాంకలకు...ప్రతిబింబాలం