మేరా భారత్ మహాన్...వందేమాతరం...
జనగణమన...జైజవాన్ జైకిసాన్...సారే జహాసె అచ్చా
ఇంక్విలాబ్ జిందాబాద్....అన్న నినాదాలే నిత్యం
మీ గుండెచప్పుళ్ళైతే...మీలో జాతీయత...ఆత్మీయత
నిజమైన దేశభక్తి.....నిండుగా ప్రవహిస్తున్నట్లే...

ఈ దేశం నాకేమిచ్చిందని చీకటిలో కూర్చొని
చింతించక ఈ దేశాభ్యుదయాకి నేనేమి చేశానని
క్షణమాలోచించమన్న నిస్వార్థపరులైన స్వాతంత్ర్య
సమరయోధుల సంఘసంస్కర్తల శుభసందేశాల్ని
కలనైనా మరువకపోతే...మీలో నీతి...నిజాయితీ
నిజమైన దేశభక్తి.....నిండుగా ప్రవహిస్తున్నట్లే...

మట్టిని నమ్మి మట్టి నుండే మెతుకులు పుట్టించే
మట్టిమనిషి రైతన్న నోట్లో నూతన సాగుచట్టాలతో

మట్టికొట్టక పోతే...మీలో మంచితనం...మానవత్వం
నిజమైన దేశభక్తి.....నిండుగా ప్రవహిస్తున్నట్లే...

కులం కుళ్ళని...మతం ముళ్ళని గ్రహించి
కులం రొచ్చులో కూరుకుపోక మతంమత్తులో ఉన్మాదులై
మతంచిచ్చు రగిలించకపోతే...మారణహోమాలు
సృష్టించకపోతే... మీలో సహనం... సమానత్వం
నిజమైన దేశభక్తి.....నిండుగా ప్రవహిస్తున్నట్లే...

ఆరని జ్యోతులైన...
అమరవీరులైన ఆ స్వాతంత్ర్య సమరయోధులను..

.దేశభక్తులను....
జాతినేతలను
స్పూర్తి ప్రదాతలను....నిత్యం స్మరించుకుంటూవుంటే...
వారి ఆశయాలకంకితమైతే...
మీలో సమతా...మమతలు
నిజమైన దేశభక్తి.....నిండుగా ప్రవహిస్తున్నట్లే...