వేస్తారు వేస్తారు
వెంకటేశ్వరుని మెడలో
మిలమిల మెరిసే
ముత్యాల
రత్నాల బంగారు హారాలు
కోట్ల ఖరీదైన వజ్ర వైఢూర్యాలు

చేస్తారు చేస్తారు
హారతి కర్పూరాలతో
పూజలు పునస్కారాలు
అర్చనలు అభిషేకాలు

అప్పుడప్పుడు ఊరేగింపులు
ఉత్సవాలు బ్రహ్మోత్సవాలు 
పాలతో పాలాభిషేకాలు
పూలతో పూలాభిషేకాలు

కనిపించమని కరుణించమని
కాపాడమని కోరిన కోర్కెలు తీర్చమని
భక్తులు గోవిందా గోవిందా యని
దిక్కులుపిక్కటిల్లేలా నినదిస్తారు

ఒక్కసారి కాలి నడకన
ఏడుకొండలు ఎక్కిన చాలు
ఆ వెంకటేశ్వరుని పాదపద్మాలకు
మ్రొక్కిన చాలు  
ఒక్కసారి తలనీలాలు
సమర్పించుకున్న చాలు

ఒక్కసారి ఒక్కక్షణం
కనులారా తనివితీర
ఆ దివ్యమంగళ రూపాన్ని  దర్శించుకున్న చాలు
మీ బ్రతుకు ధన్యమే
దక్కును ఈ జన్మకు మీకు
వేయి జన్మల పుణ్యఫలమే