అలంకరణ పేర 

అంగడిబొమ్మలా...అర్థనగ్నంగా... 

అందం పేర గుడి మీద 

బూతుబొమ్మలా  

గుట్టురట్టయ్యేలా...అసహ్యంగా...

నాగరికత పేర 

వాత్సాయనుడి కామశాస్త్రంలో 

శృంగారభంగిమలా...అసభ్యంగా...

అందరికళ్ళు కొంగుమీదే పడేలా 

కొరుక్కుతినేలా బరితెగించి నవ్వుతూ 

నడిబజార్లో తిరిగేది నా భారతనారి కాదు...

హొయలు పడుతూ 

వంకర్లు తిరుగుతూ పబ్లిక్ గా రోడ్డుమీద

పగలబడి నవ్వేది నా భారత నారి కాదు...

దూరదర్శన్ లో ప్రవహించే ఫారిన్ 

కల్చర్ కి ప్రతిరూపం నా భారతనారి కాదు...

అందని తన అందాలను 

ప్రపంచ‌ సుందరిలా ప్రబంధ నాయకిలా 

అందరిముందారబోసేది నా భారతనారి కాదు... 

నా భారతనారి...అంటే  

ఎముకల గూడుగా మార్చే 

ఎయిడ్స్ ను దిగుమతిచేసే దిష్టిబొమ్మ కాదు...

నా భారతనారి...అంటే 

తలనిండా పూలుపెట్టి తల్లిలా కనిపించు 

చేతినిండా గాజులు తొడిగి చెల్లిలా అనిపించు 

నా భారతనారి...అంటే 

సీతలా అగ్నిగుండములో దూకే ఆదిపరాశక్తి !

నా భారతనారి...అంటే 

సతీసావిత్రిలా సంప్రదాయానికి 

సంస్కృతికి సహనానికి సంస్కారానికి సంకేతం! 

నా భారతనారి...అంటే 

నిస్వార్థ సేవకు నిలువెత్తు నిదర్శనమై మదర్ 

థెరిసాలా ప్రపంచానికి ప్రేమనుపంచే శాంతిపావురం!