అమ్మో ! అమ్మో !
ఎండలు ఎండలు బాబోయ్ !
కొండలు
పిండౌతున్నాయ్ బాబోయ్ !

ఒకవైపు ఉక్క...
ఉదయభానుడి ఉగ్రరూపం
మరోవైపు "నిప్పులకొలిమి"
ఎన్నడూ లేని ఎండతీవ్రతకు
ఉక్కిరిబిక్కిరైపోతున్న జనం...

వడదెబ్బకు...
పిల్లలు వృద్ధులు
పిట్టల్లా"...రాలిపోతున్నారు
వలస వ్యవసాయ కూలీలు
విల విలలాడి పోతున్నారు

ప్రచండ భానుడు
భగభగ మండుతూ
వడగాల్పుల వలలు...విసురుతూ
ప్రపంచంపై పగ తీర్చుకుంటున్నట్టు
ప్రజలంతా..."చెరువు గట్టున
పడిన చేపపిల్లల్లా"...
గిలగిలా కొట్టుకుంటున్న వైనం...

కేరళ వైపునుండి చల్లని
ఋతుపవనాలెప్పుడు వీచునో
అప్పుడే మనకు...ఉపశమనం
ఔనిది పచ్చినిజం...
"ప్రకృతియే పగబడితే"
"నరుని బ్రతుకు నరకమేనోయ్"

ఉష్ణోగ్రతల విలయతాండవం...
అంతా గజిబిజి గందరగోళం...
ప్రళయం అంచున భూగోళం...

అమ్మో ! అమ్మో !
ఎండలు ఎండలు బాబోయ్ !
కొండలు పిండౌతున్నాయ్ బాబోయ్ !