ఆ ఇద్దరూ తెల్లని చల్లని దేవతలే
ప్రేమకు ప్రతిరూపాలే
నిస్వార్థ సేవకు నిలువెత్తు నిదర్శనమైన
మథర్ తెరిస్సాలే, ఐతే
ఆ ఇద్దరు కంటకన్నీరు పెట్టుకున్నారు

తన కరోనాసేవలకు గుర్తింపుగా
సంఘీభావంతో,తలపై పూలవర్షం కురిపిస్తూ
అందరూ అభిమానంతో,గౌరవంతో
కరతాళధ్వనులతో, అపార్ట్ మెంట్లోకి
Hearty Welcome to our Apartment
We are Proud of You God Bless You
అంటూ,ఆత్మీయంగా ఆహ్వానించినందుకు
ఉద్వేగానికి గురై, ఉక్కిరి బిక్కిరై
కన్నీరు పెట్టుకుంది...ఒక దేవత...
అవి ఆనందబాష్పాలే....
మరిచిపోలేని మధుర జ్ఞాపకాలే...

అపార్ట్ మెంట్ లోనికి వెళ్ళడానికి
అనుమతివ్వకపోగా అడ్డుపడి,దాడిచేసి
No Entry to our Apartment
You Corona Devil Get Out
అంటూ ,దుర్భాషలాడినందుకు,
దూరంగా నెట్టి వేసినందుకు
ఆవేదనతో, అవమానంతో
కన్నీరు పెట్టుకుంది మరో దేవత.....
ఇది మానవత్వానికి ఓ మాయని మచ్చ....

అపార్ట్మెంట్లలో వుండే
ఓ అంధులారా  ! ఓ అహంకారుల్లారా !
ఓ మూర్ఖులారా ! ఓ మానవమృగాల్లారా !
మీరింకెప్పుడు మారతారు?
ఈ కరోనా కాలంలో కాక
మీకింకెప్పుడు కనువిప్పుకలుగుతుంది ?
ఈ కరోనా కాలంలో కాక

కరోనా మృత్యువు
కళ్ళముందున్నా లెక్కచేయక
ఆ యమధర్మరాజునే ఎదిరించి‌
నిద్రాహారాలు మాని,ఉద్యోగమే ఊపిరిగా
నిస్వార్థంగా మీకు సేవలందించి,
తమ ప్రాణాలనే ఫణంగా పెట్టి,
మీకు ప్రాణం పోసిన, మీకు మరుజన్మ నిచ్చిన
ఆ త్యాగమూర్తులనా మీరు అవమానించేది?
ఆ కనిపించే దేవుళ్ళనా మీరు అడ్డుకునేది ?
ఎంతటి అవివేకం ? ఎంతటి అనాగరికం?
ఎంతటి అజ్ఞానం ? ఎంతటి అహంకారం?

ఉత్కృష్టమైన ఈ మానవజన్మలో
నీతితప్పి నేడు,మానవత్వాన్ని మరచిన మీకు,
నిశ్చయంగా మరుజన్మలో నీచజన్మనే
ప్రసాదించును గాక!  పైనున్న ఆ పరమాత్మ...