ఒమిక్రాన్ వేరియంట్‌ పేరు విన్నంత
విస్తుపోతోంది విశ్వమంతా
ప్రపంచమంతా ప్రసవవేదన పడుతోంది
ప్రజలు కార్చే కన్నీటిధారలకు
మహాసముద్రాలే ఉప్పొంగుతున్నాయి

మండే ప్రజలగుండెల్లో
అగ్నిపర్వతాలే బ్రద్దలౌతున్నాయి
క్షణక్షణం బ్రతుకు‌ భయం
కంటినిండా కునుకు లేదు
కడుపునిండా తిండి లేదు
కోట్లున్నా ఎందుకూ కొరగావు

ఏ క్షణాన ఈ ఒమిక్రాన్
ఏ వైపు నుండి ఏ రూపంలో
దాడిచేస్తుందోనని
గజగజ వణికిపోతున్న
నిస్సహాయులై ఏమిచేయలేక
ఏ దేవుళ్ళకు మొరపెట్టాలో
ఏ దేవతలకు మ్రొక్కాలో అర్థంకాక
ఆందోళనలో ఆవేదనతో అర్థంకాని
మానసికక్షోభతో కొట్టుమిట్టాడుతున్న

ఊపిరాడక ఉక్కిరిబిక్కిరౌతున్న
ఆసుపత్రుల్లోపిట్టల్లా రాలిపోతున్న
మృత్యువు కౌగిట్లోకి జారిపోతున్న

కన్నుమూసి కట్టెగా మారిపోతున్న
కడచూపు కరువై కన్నవారు దూరమై
ఏకాకులై కాటికి పారిపోతున్న
అనాధలై శ్మశానాల్లో కాలిపోతున్న
ఈ మానవాళిని రక్షించేవారేలేరా?

ఓ దేవుల్లారా ! ఎక్కడ మీరెక్కడ ?
కనిపించరేమి ? మీ భక్తులను కరుణించరేమి?
మళ్ళీ ఒమిక్రాన్ వేరియంట్
పేరుతో వస్తోన్న కరుణలేని
కరోనాను ఖతంచేసి కాటికి పంపరేమి ?
మీరే దిక్కని నమ్మిన మీ భక్తులను కాపాడరేమి?
అదిగో అన్ని ఆయుధాలు ధరించి
యుద్ధానికి సిద్ధమైన మీ భక్తుల్ని
ఓ  దేవుళ్ళారా! ఓ దేవతలారా ! ఆశీర్వదించండి!
ఒమిక్రాన్ భూతాన్ని ఓడించే శక్తిని ప్రసాదించండి!