"చేయీ చేయీ తగిలింది
"హాయి హాయిగా ఉంది
"పగలు రేయిగా మారింది
"పరువం ఉరకలు వేసింది"

అంటూ... అందాలన్నీ
ఆరబోస్తూ అతిచనువుగా
తనువు తనువు తాకుతూ
తిక్కరేగి వీధుల్లో విచ్చలవిడిగా
అచ్చోసిన ఆంబొతుల్లా
అర్థనగ్నంగా తిరుగుతూ
పోకిరిగాళ్ళు వేసే కుళ్ళు
జోకులకు విరగబడి నవ్వుతూ...

మెరుపు తీగలా
మెలికలు తిరుగుతూ...
ఓరచూపులతో పెదాల్ని
మత్తుగా కొరికితే...
మయూరిలా కులికితే...

రేపు పోకిరోళ్ళు
మూ...మూ...అంటూ
ముద్దులడగవచ్చు...
నీవు...నో...నో అంటూనే
ఒకటికి వందివ్వొచ్చు...

నిన్ను పార్కుల్లో
ఖరీదైన కార్లలో తిప్పవచ్చు
డ్రింక్స్ కి డ్రగ్స్ కి
నిన్ను బానిసను చేసి
పీకలదాకా ఏదో మాయలో
తెలియని ఏదో మత్తులో ముంచి...

నీకు పిచ్చిముదిరిపోయేలా...
అడగకుండానే అన్నీ ఇచ్చేలా...
కడకు ప్రాణం సైతం ఇచ్చేలా...
నిన్ను కీలుబొమ్మగా మార్చవచ్చు...
నిన్ను ఉన్మాదంలో ముంచవచ్చు...
నీవు ఊబిలో కూరుకుపోయావని
నీవు "వారి వల్లో చిక్కుకున్న ఒక
"లేడివని"నీవు తెలియక పోవచ్చు...!

ఆపై నీపై
ఆధిపత్యం
సాధించినా...
నీతో పడుకున్నా...
నిన్ను వాడుకున్నా...
నీతనువుతో ఆడుకున్నా...
ఏదైనా అఘాయిత్యం జరిగినా...
నీకు "సోయనే" లేకపోవచ్చు...!

అందుకే
అజ్ఞానమే ఆస్తిగా...
లోకజ్ఞానమే నాస్తిగా...
ఆకర్షణే ఆభరణరంగా...
బ్రతికే ఓ బంగారు బొమ్మల్లారా..!
ఓ అమాయకపు అమ్మాయిల్లారా..!
మీ చుట్టూ నయవంచకులుంటారని
గుర్తుంచుకోండి నమ్మి మోసపోకండి..!
నలుగురిలో నవ్వులపాలు కాకండి...!

"అతిచనువు అగ్గిపుల్లైతే"...
పచ్చని బ్రతుకు భగ్గుమంటుంది
మీ బంగారుభవిష్యత్ మీ కళ్ళముందే
భస్మమైపోతుంది జరా జాగ్రత్త సుమీ..!