1...
గో...దానం
భూ...దానం
అన్న...దానం
వస్త్ర...దానం
గృహ...దానం
విద్యా...దానాలలో ఏది మిన్న...
అన్ని దానములకన్న
"గోదానం"...నిన్ననే...కానీ
కొద్దిరోజులకే పాలిచ్చే ఆ
గోమాత వట్టి పోవును ఆపై
పోషించుట పెనుభారమౌను...
ఆ గోదానం కన్న
"భూదానం"...మిన్ననే...
పంటలు పండించవచ్చు ...
కడుపులు నింపవచ్చు...కాని...
భూఘర్షణలు జరిగితే పగా
ప్రతీకారాలతో ఒకరినొకరు
కత్తులతో పొడుచుకొందురు
కసితో ప్రాణాలు తీసుకొందురు
ఆ భూదానం...కన్న...
"అన్నదానం"...మిన్ననే
కానీ...తిన్న అన్నం
తక్షణమే అరిగిపోయేను ఆపై
ఆకలితో కడుపు రగిలిపోవును
2...
ఆ అన్నదానము కన్న
"వస్త్రదానం"...మిన్ననే
కాని...కొద్ది రోజులకే
ధరించినా దాచిఉంచినా ...
వస్త్రం చిల్లులు పడును...
చివరకు చిరిగిపోవును...
ఆ వస్త్రదానం కన్న
"గృహదానం"...మిన్ననే
కాని...కొద్ది రోజులకే
ఆ గృహం కూలిపోవచ్చును
అగ్నికి ఆహుతి కావచ్చును
కానీ అరిగిపోక...చిరిగిపోక...
కూలిపోక...అగ్నికి కాలిపోక...
వట్టి పోక...పరులపాలు కాక...
ప్రాణాలు...గాలిలో కలిసిపోక...
దొంగలచే దోచుకోబడక...
తరతరాలకు తరిగిపోక...
అక్షయపాత్రగా చిరకాలం మిగిలేది
అన్ని దానములకన్న మిన్నగా నిలిచేది
విద్యాదానమే అది ఆ సరస్వతీదేవి వరమే
 |