ఓ రైతన్నలారా!
మీకేం భయంలేదని మీ వెనుకే
మేమున్నామన్న భరోసానిద్దాం !
తిన్నఇంటి వాసాలు లెక్కపెట్టే
ఆకలేస్తే అన్నంపెట్టే అన్నదాతను
పెన్నుతో వెన్నుపోటు పొడిచే
ఈనల్లచట్టాలను "చెత్తకుండీలో" విసిరేవరకు
విశ్రమించక...పిడికిళ్లు బిగించి...
ప్రభుత్వ వైఖరిని...ప్రశ్నిస్తున్న...ప్రతిఘటిస్తున్న
ఉగ్రులై...ఉద్యమిస్తున్న...రైతన్నలకు మద్దతిద్దాం !
మేకవన్యపులుల ముసుగు వేసుకున్న
ఆ ముడుచట్టాలను
"బంగాళాఖాతంలో" కలిపేవరకు
చాటుమాటుగా కాటు వేస్తే
ఈ విషసర్పాల విషపు కోరలు విరిచేవరకు
విశ్రమించక...పిడికిళ్లు బిగించి...
ప్రభుత్వ వైఖరిని...ప్రశ్నిస్తున్న...ప్రతిఘటిస్తున్న
ఉగ్రులై...ఉద్యమిస్తున్న...రైతన్నలకు మద్దతిద్దాం !
ఎన్నిసార్లు పడినా పైకి లేచే
రైతేరాజని న్యాయం రైతు వైపేనని
ఏ రోజైనా రైతుదే విజయమని
ఎన్ని కుట్రలు కుతంత్రాలు పన్నినా
చెడుకే ఓటమని మంచికే గెలుపని
చీకటీకే ఓటమని వెలుగుకే విజయమని
చివరికి ఘనవిజయం
రాజధానిరోడ్లను ట్రాక్టర్లతో దున్నుతున్న
"చలిచీమలదండై" కదిలి
కదంతొక్కుతున్న ఈ రైతన్నలదేనని
ఈ "నిరసన వాయుగుండం"
తీరందాటితే ఇక "పెనుతుఫానేనని"
గద్దెలనెక్కిన పెద్దలు "గుర్తించేవరకు"
విశ్రమించక... పిడికిళ్లు బిగించి...
ప్రభుత్వ వైఖరిని...ప్రశ్నిస్తున్న...ప్రతిఘటిస్తున్న
ఉగ్రులై...ఉద్యమిస్తున్న...రైతన్నలకు మద్దతిద్దాం !
 |