ఏమిటో ఆ మూడేమిటో ?

అవి రైతన్నల కుత్తుకలకు ఉరితాళ్లో

మెడపై వ్రేలాడే గండ్రగొడ్డల్లో

పదును పెట్టిన కత్తులో కటారులో

బాకులో మరతుపాకులో

ఎక్కుపెట్టిన రాక్షసబాణాలో ఎవరికెరుక?

అవి మూడు నల్లనిచట్టాలంట

ఎవరికో చుట్టాలంట ఎవరికీ అర్థం కావంట 

ఏమిటో ఆ మూడేమిటో?

పెన్నుపోటుతో వేటువేయడానికి

వెన్నుపోటు పొడవడానికి

చాటుమాటుగా కాటువేయడానికి 

సిద్దంగా ఉన్న కాలనాగులో

పూలదండలు చేతబట్టుకుని 

ముసిముసి నవ్వులు నవ్వుతూ

కూర్చున్న మేకవన్యపులులో ఎవరికెరుక?

అవి మూడు నల్లనిచట్టాలంట

ఎవరికో చుట్టాలంట ఎవరికీ అర్థం కావంట 

ఏమిటో ఆ మూడేమిటో?

అవి అమృత భాండాలంట

కాదు కాదు అవి ఆరక రగలే అగ్నిగుండాలో

సుడులు తిరిగే సుడిగుండాలోఎవరికెరుక?

అవి మూడు నల్లనిచట్టాలంట

ఎవరికో చుట్టాలంట ఎవరికీ అర్థం కావంట 

ఏమిటో ఆ మూడేమిటో?

అవి బ్రద్దలవడానికి సలసల కాగే లావాను 

విరజిమ్మడానికి సిద్ధంగా ఉన్న అగ్నిపర్వతాలో

ఉరుములు మెరుపులు లేకుండా

అకస్మాత్తుగా నెత్తిన పడే పిడుగులో ఎవరికెరుక?

అవి మూడు నల్లనిచట్టాలంట

ఎవరికో చుట్టాలంట ఎవరికీ అర్థం కావంట 

ఏమిటో ఆ మూడేమిటో?

అల్పపీడనాలో వాయుగుండాలో 

వరదలో పెనుతుఫానులో 

సుడిగాలులో సునామీలోఎవరికెరుక?

అవి మూడు నల్లనిచట్టాలంట

ఎవరికో చుట్టాలంట ఎవరికీ అర్థం కావంట 

వాటి  పరమార్థం ఆ పరమాత్మకే ఎరుకంట

అర్థంకాని ఆ వ్యర్థమైన చట్టాలెందుకంట? 

ఎవరికోసమంట? ప్రభుత్వాలు అధికారులు

ఆలోచించాలంట  రైతన్నలను రక్షించాలంట