అత్యాచారాలంటేనే

ఆరని చితిమంటలు

ఓ అమాయకపు

అమ్మాయిల్లారా !

ఎప్పుడైనా ఎక్కడైనా

మగువలుగురైతే మానభంగానికి

వేధించి‌ వెతలకు గురిచేసి 

వెలివేసే ఈ వెర్రి సంఘానికి

భయపడితే చాలు 

బ్రతుకు బుగ్గిపాలు

ఉద్యమిస్తేనే స్త్రీ 

జాతికి ఉషోదయమన్న

ఓ నగ్నసత్యాన్ని తెలుసుకోండి !

ఓ అమాయకపు

అమ్మాయిల్లారా !

మీరుకమ్మని కలలుకనే 

కన్యపిల్లలే కావొచ్చు కానీ

ఆ కలలను కాలరాస్తే 

మీలో నిగ్రహం నశిస్తే 

ఉగ్రరూపం దాల్చే

శత్రువులను చీల్చే

కలకత్తా కాళికలు మీరని

మీరు పూరిగుడిశల్లో 

పుట్టివుండవచ్చు కానీ

గాండ్రించి మానవమృగాలను 

చీల్చిచెండాడే

చిరుతపులులు మీరున్న

ఓ నగ్నసత్యాన్ని తెలుసుకోండి !

ఓ అమాయకపు

అమ్మాయిల్లారా !

మీరు ఆకారానికి 

ఆడపిల్లలే కావచ్చు కానీ

అన్యాయాలకు 

అక్రమాలకు పాల్పడే

అవమానాలకు గురిచేసే

అక్రమార్కులను అంతంచేసే

అగ్గిపుల్లలు మీరని

కాంతినివ్వగలరని

కాల్చిబూడిద చేయగలరని...

ఓ నగ్నసత్యాన్ని తెలుసుకోండి !

ఓ అమాయకపు

అమ్మాయిల్లారా !

మీరు అబలలే కావొచ్చు, కాని 

అమ్ముడుపోవడానికి

మీరు అంగడిబొమ్మలు కాదని

మీరు ఆదిపరాశక్తికి ప్రతిరూపాలన్న

ఓ నగ్నసత్యాన్ని తెలుసుకోండి !...