"సూర్యుడు" లేక
ఆకాశంలో వెలుగెక్కడిది...?
"గురువులు" లేక
బడిలో పాఠాలెక్కడివి..?
"దైవం" లేక గుడిలో
అర్చనలెక్కడివి?ఆరాధన లెక్కడివి?
"విద్యలేక" మనిషికి వికాసమెక్కడిది?

"విద్య" నేర్చినవాడే
విశ్వవిజేతై విశ్వాన్ని ఏలగలడు ...
కళ్ళెం చేతిలో ఉన్నవాడే అశ్వాన్ని అదుపులో ఉంచగలడు...

విద్యలేనినాడు వాడు సంతలో
అమ్ముడుపోయే ఓ వింత పశువే...

నాలుగు వేదాలు వెలిగిన
నా భరతావనిలో
ఏ కుసంస్కారుల కుట్రలో
భాగమో ఏమొ కానీ
"నాలుగు కులసర్పాలు"బుసలు
కొడుతూ విషం చిమ్ముతున్నాయి

ఎందరినో అమాయకపు
జనాన్ని కర్కశంగా కాటువేస్తున్నాయి
ఎందరో అభాగ్యులు కూడుకు
గుడ్డకే కాదు విద్యకు విజ్ఞానానికి
సైతం దూరమైపోతున్నారు
తరతరాలుగా అజ్ఞానంలో...
అంధకారంలో...మ్రగ్గిపోతున్నారు...

ఔను ఏ వసతులులేని రోజుల్లో
విదేశాలకేగి "ఉన్నతవిద్య"నార్జించి...
ఆ విజ్ఞానంతోనే రాజ్యాంగ చేసి కోట్లమంది బడుగు బలహీన వర్గాల
ప్రజల జీవితాలను వెలుగుమయం చేసి...

ఏవరూ చేరుకోలేనంత ఎత్తుకు ఎదిగి
ఖండాంతర ఖ్యాతిని ఆర్జించిన
"మేధావి"
"జ్ఞానశిఖరం"...
"విద్యా జ్యోతి"...
రాజ్యాంగ నిర్మాత"
"బహుముఖ ప్రజ్ఞాశాలి...
"దళితజాతి ఆశాకిరణం"...
"అమరజీవి అంబేద్కర్"...
అందించిన "శుభసందేశం" ఒక్కటే....

"అంటరానితనం" మంటల్లో
పడి మలమలమాడిపోతున్న...
కులసర్పాలకాటుకు బలైపోతున్న...
తాడితపీడిత బడుగుబలహీవర్గాలకు
ఈ సంఘంలో "సమానత్వం"
"ఒక్క"విద్యద్వారానే" సాధ్యమని...