కడుపునిండినవారు కష్టమెరిగినవారు

అమ్మ ఇచ్చిన
కమ్మని పాలు
కడుపు నిండా త్రాగి
నోట్లో వేలెట్టుకొని
ఊయల్లో ఊగి ఊగి
హాయిగా కంటినిండా
ఆదమరచి నిద్రపోతుంది
ఇంటిలో ఓ చంటి పాప


పొద్దుగాల ఎద్దులు
తోలుకొని పొలాని కెళ్ళి
స్వేదం చిందించి దుక్కిదున్నిదున్ని
ఆదమరచి నిదురపోతాడు
కంటినిండా హాయిగా సేద్యం చేసే రైతన్న

కొండలమీద బండలుమోసి
బద్దలు చేసి కూడింత దిని
చెట్టుకింద కునుకుతీసే ఓకూలన్న
ఎర్రని ఎండలో కట్టెలు కొట్టి కొట్టి
ఆదమరచి నిదురపోతాడు
కంటినిండా హాయిగా
కండలు కరిగించిన ఓ కష్టజీవి

అప్పులన్నీ తీరిపోయిన
ఓ మధ్య తరగతి ఉద్యోగి
హాయిగా ఆ దమరచి
కంటినిండా నిద్రపోతారు
గాఢనిద్రలోకి జారిపోతారు

నిద్రలేక కంటికి
కునుకురాక
ఉక్కిరిబిక్కిరౌతూ
పక్కమీద దొర్లేదెవరు ?

కోటీశ్వరులు కొందరు
ఉన్నదాన్నెవరైనా
దోచుకుంటారేమోని
అనుమానంతో
ప్రాణభయంతో పాపం
కంటి మీద కునుకు వుండదు

నైట్ డ్యూటీ చేసే శ్రామికులకు
భగ్న ప్రేమికులకు
శోభనం రాత్రి పడకగదిలో
పూలపాన్పుపై పవళించిన
పడుచుజంటలకు తెల్లారేవరకు
కంటి మీద కునుకు వుండదు

కంప్యూటర్ ఇంజనీర్లకు
కారుచీకట్లో తిరిగే దోపిడిదొంగలకు
కంటి మీద కునుకు వుండదు