తినాలనుకున్న స్వీటు తినండి
కొనాలనుకున్న వస్తువు కొనండి
దయచేసి ఆలస్యం చేయకండి
ఆలోచనలు పరిపరి విధాలపోతాయి

ఎప్పుడైనా అవసరమైతేఎవరినుండైనా
సలహాలు సూచనలు స్వీకరించండి
కాని‌‌ నిర్ణయాలు మాత్రం మీరే తీసుకోండి

కొందరు కొన్నికొనరు మరొకర్ని కొననివ్వరు
వారు తినరు మరొకర్ని తిననివ్వరు
అందుకే బయటి వారి సలహాలు సూచనలు
మనకు మంచి కన్న చెడునే ఎక్కువ చేస్తాయి

కాలచక్రం గిర్రున తిరగ్గానే బలమైన
ఆలోచనలు సైతం బలహీనమైపోతాయి
ఒక్కోసారి ఉచిత సలహాలు కొన్ని
ఉక్కిరిబిక్కిరి చేస్తాయి ఊపిరాడనివ్వవు
సందేహాల కందిరీగలై కుడతాయి
భూతాలై భయపెడతాయి మనల్ని బాధ పెడతాయి 

మన మంచి ఆలోచనల్ని సైతం బంధిస్తాయి
సమస్యలౌతాయి కాళ్ళకు సంకెళ్లవుతాయి
ముళ్ళబాటలౌతాయి మనల్ని ముందుకెళ్ళనివ్వవు

అతిగా ఆలోచిస్తాము ఆలస్యం చేస్తాము
చూద్దాం చేద్దాంలే తొందరేముంది అనుకుంటాం
అవగాహనలేని అమాయకులు‌ సలహాలతో
మన మనసులు మారిపోతాయి
మన ఆశల దీపాలు ఆరిపోతాయి

ఆలోచించండి ‌కానీ ఆలస్యం చేయకండి
కుటుంబ సభ్యులందరు కూర్చొని
సకాలంలో సత్సంకల్పబలంతో 
సమయస్ఫూర్తితో సమిష్టిగా తీసుకొనే సరైన
నిప్పులాంటి నిర్ణయాలే సత్ఫలితాలనిస్తాయి
సందేహాం లేదు లేనేలేదు ఇది ముమ్మాటికీ నిజం