సక్రమమైన ప్రవర్తనలేని
అక్రమ సంబంధాలన్నీ
ఎంతటి వికృతమైనవో
ఊహాతీతం...
అత్యంత అమానుషం...

కొందరు విచిత్రంగా
పెళ్ళైన తర్వాత
పిల్లల్ని కనిన తర్వాత
భర్తలే ప్రత్యక్ష దైవాలంటారు
నిత్యంపూజలు చేస్తుంటారు

కాని,మాయమాటలతో
మత్తెక్కించే మాయగాళ్ళను
కమ్మని కబుర్లు చెప్పి
కవ్వించే కసాయివాళ్ళను

కాల్చిన సిగరెట్టును
కాలిక్రిందేసి నలిపేసే
నయవంచకులను
ఏరుదాటి తెప్పతగలేసే
వాడుకొని వదిలేసే
కళ్ళు పొరలు కమ్మిన
కామాంధులనే నమ్ముతారు
చచ్చేంతగా...ప్రాణాలిచ్చేంతగా...

ఆపై కన్నవారి
కట్టుకున్నవారి
కళ్ళుగప్పి ప్రేమికుల చుట్టే
బరితెగించి తిరుగుతారు...
వారి మాయలో...మత్తులోపడి
వారి చేతుల్లో కీలుబొమ్మలై...
వారు ఆడించినట్లు ఆడతారు...
వారు అడగకుండానే అన్నీ ఇచ్చేస్తారు...

ఆకలి తీరిన తర్వాత
ఎంగిలి ఇస్తరాకల్లే వీధిలో
విసిరేస్తే... చేసేదిలేక...
ఎవరికీ చెప్పుకోలేక...
అవమానాలను భరించలేక...

పుట్టిన పిల్లల
బంగారు భవిష్యత్తు
బుగ్గిపాలవుతుందని...కానీ
ఆధారపడిన వారందరూ
అనాధలౌతారని...కానీ
రెండు కుటుంబాల
పరువువంతా గంగలో
కలిసిందిపోతుందని...కానీ

ఒక క్షణమైనా, ఆలోచించక...
దిక్కుతోచక...క్షణికావేశంలో
ఏ నిద్రమాత్రలో మింగి....
ఏ ఫ్యానుకో ఉరేసుకొని...
ఏ బిల్డింగ్ పైనుండో దూకి...

ఆత్మహత్య చేసుకుంటారు
ప్రాణాలు తీసుకుంటారు
అభం శుభం ఎరుగని
అన్యం పుణ్యం తెలియని
అమాయకపు "అమ్మలు" కొందరు.

ఔను...
చచ్చిసాధించే దేముంది ?
కన్నవారికి గుండెకోత తప్ప
విచిత్రమైన ఓ విధివ్రాత తప్ప
చావు ఏసమస్యకు పరిష్కారం కాదన్న
ఓ నిండు నిజం తెలియకపోవడం తప్ప
బంగారమంటి బ్రతుకు బలైపోవడం తప్ప.