పచ్చని పచ్చికలో నేనక్కడ !

ఎత్తైన పర్వతాల్లో 

కప్పిన తెల్లనిమంచులో 

పశువుల్లో పక్షుల్లో పచ్చని వృక్షాల్లో 

పరవశింపజేసే ప్రకృతిలో నేనక్కడ !

నీటిలో ఈదే చేపల్లో నేనక్కడ !

నీటిమీద తేలియాడే ఓడల్లో నేనక్కడ !

ఏడు రంగుల ఇంద్రధనుస్సులో నేనక్కడ !

పొలంలో పండిన పచ్చనిపైరులో నేనక్కడ !

పురివిప్పిఆడే నెమలి పించంలో నేనక్కడ !

నీలాల నింగిలోఎగిరే పతంగంలో నేనక్కడ !

చెంగు చెంగునదూకే లేగదూడల్లో నేనెక్కడ !

అడవిలో తిరిగే జంతువుల్లో

ఎగిరే రంగురంగుల పక్షులరెక్కల్లో నేనక్కడ !

బడిలో ఆటపాటల్లో మునిగితేలే పసిపిల్లల 

ముసిముసి నవ్వుల్లో అమాయకపు చూపుల్లో 

అల్లరి చేష్టల్లో నేనెక్కడ !

నవజవ్వని చిలకపలుకుల్లో చూసే చిలపిచూపుల్లో

ఓరచూపుల్లో కోరచూపుల్లో నాజూకైన నడుములో

ఎగిరే ముంగురుల్లో జడలో మెడలో కాటుక కళ్ళల్లో 

చేతి గాజుల్లో కాలి అందెల్లో కట్టిన చీరలో 

పెట్టిన బొట్టులో నేనక్కడ !

జలజలదూకే జలపాతాల్లో గలగలపారే సెలయేరుల్లో  

నిర్మలంగా నిశ్చలంగా ప్రవహించే నదుల్లో నేనక్కడ

తీరం చేరాలని ఆరాటపడే కడలి అలల్లోనేనక్కడ !

విరితోటలో విరిసి గుబాళించే ప్రతిపువ్వులో నేనక్కడ !

గుడి గోపురాల్లో గర్భగుడుల్లో 

ప్రతిష్టించిన సుందరమైన దేవతా శిల్పాల్లో నేనక్కడ !

ఓ అందమా నీవెక్కడ? చల్లనైన అమృతహస్తాల్లో

మానవత్వం నిండిన ప్రతిమనిషి అంతరంగంలో నేనక్కడ !