కొన్ని సమస్యలొచ్చి 

తిష్టవేస్తాయి

ఇంట్లో అతిథుల్లా

ఒంట్లో మొండివ్యాధుల్లా

కొన్ని సమస్యలొచ్చి 

పీడిస్తాయి పీడకలల్లా

పిచ్చిచేష్టలు చేస్తాయి 

పీకలు పిసికేస్తాయి పిచ్చివాళ్ళలా

ఉక్కిరిబిక్కిరి చేస్తాయి 

ఊపిరి తీస్తాయి పిశాచుల్లా

పీక్కుతింటాయి రాబందుల్లా

కొన్ని సమస్యలు సంసారుల చుట్టే  

సమాధుల్లా నోరు తెరుచుకుంటాయి 

కొన్ని సమస్యలు మధుర సంగీతాన్ని 

కొన్ని విషాద సంగీతాన్ని వినిపిస్తాయి 

సమస్యలు లేనిదెవరికీ 

సన్యాసులకే

సమస్యలకు భయపడి 

పారిపోయే పిరికిపందలకే

కానీ నిత్యం సమస్యల

సుడిగుండాలలో చిక్కుకుపోయేది

సతమతమయ్యేది సహవాసం చేసేది 

సహనంతో సర్దుకుపోయేది సంసారులే

ఆకాశంలో విహరిస్తున్న

సముద్రగర్భంలో దాక్కున్న

ఈ భూమిపై బ్రతుకుభారం మోస్తున్న 

వారంతా సమస్యల సంకెళ్ళెకు బంధీలే 

సమస్యల విషసర్పాల కోరలకు బలైనవాళ్ళే