కమ్మని కలలెన్నోకని కన్ననాటినుండి

కన్నబిడ్డలు కళ్ళు తెరిచిన నాటినుండి 

రాత్రింబవళ్ళు కంటికిరెప్పలా కాపాడిన 

కాలిలో ముల్లుగుచ్చుకుంటే కన్నీరు కార్చిన  

తమ కడుపులు మాడ్చుకొని

కన్నబిడ్డలకు కమ్మని తిండిపెట్టి ఆకలితీర్చిన

చిన్నజబ్బుచేస్తే డాక్టర్ దగ్గరికి పరుగులు తీసిన 

తలకుమించి అప్పులుచేసిన

స్కూలు కాలేజి ఫీజులు కట్టిన

గొప్ప విద్యావంతులను చేసిన

ఉన్నతుద్యోగులుగా తీర్చిదిద్దిన

కాలి చెప్పులు అరిగేలా తిరిగి తిరిగి

ఖరీదైన విదేశీ సంబంధాలు వెదికివెదికి

అంగరంగ వైభవంగా ఘనంగా వివాహాలు చేసిన 

ఆస్తులు అందరికి పంచి అస్థిపంజరాలుగా మారిన

అమ్మానాన్నలను 

కనికరం లేక కసిరి కొట్టే

బాధ్యతలేక బయటికి నెట్టే 

కన్నబిడ్డలెంతటి కఠినాత్ములు!

ఎంతటి క్రూరులు ! ఎంతటి నీచులు ! 

ఎంతటి మూర్ఖులు ! ఎంతటి నిర్దయులు ! 

ఇంతటి పాషాణ హృదయులు కృతజ్ఞతలేని

ఈ కన్నకుమారులకన్నా ఈ కన్నకుమార్తెలకన్నా

విశ్వాసమున్న వీధిల్లోని ఆ శునకాలే నయం గదా!