కష్టాలు కన్నీళ్లు
కలతలు కలహాలు
చింతలు చీకాకులు
వివాదాలు విడాకులు
సహజమే సంసారమన్నాక...

భయపడకండి...
కలవరపడకండి...
కంగారు పడకండి...
ధైర్యంగా ఉండండి...

నిప్పంటుకున్న
తారాజువ్వ ఏంచేస్తుంది..?
రివ్వుమని నింగి కెగిరిపోతుంది

కోరలుచాచే కోడెనాగు
తోకత్రొక్కితే ఏంచేస్తుంది..?
కస్సుమంటుంది కాటు వేస్తుంది

గట్టిగా నేలకేసి
కొట్టిన బంతి ఏం చేస్తుంది..?
అంతే వేగంగా గాలిలో పైకి లేస్తుంది

చీకటిగదిలో బంధించి
కొరడాలతో కొట్టిన పిల్లి ఏంచేస్తుంది..?
మీద మీద పడి రక్కుతుంది

దెబ్బతిని తప్పించుకున్న
బెబ్బులి ఏంచేస్తుంది..? కసితో
తిరిగి వేటగాన్నే వేటాడుతుంది

తిన్నగా తీరం దాటిన
తుఫాన్ ఏం చేస్తుంది..?
విలయతాండవం చేస్తుంది
భారీ విధ్వంసాన్ని సృష్టిస్తుంది

బ్రద్దలవడానికి సిద్దంగా వున్న
అగ్నిపర్వతం ఏం చేస్తుంది..?
లావాను విరజిమ్ముతుంది...

అడవిలో ఆకలితో వున్న
ఆడసింహం ఏం చేస్తుంది ?
అమాయకపు జింకల కోసం
వెర్రిగా వెదుకుతుంది

కారుచీకట్లో చిక్కుకున్న
ఏ మనిషైనా ఏం చేస్తాడు ?
చిరుదీపాన్ని వెలిగిస్తాడు

కష్టాలు కలవర పెట్టే వేళ
ఏ మనిషైనా ఏం చేస్తాడు ?
జీవితంలో తగిలిన
ఎదురుదెబ్బలు గుర్తుచేసుకుంటూ
గుణపాఠాలను నేర్చుకుంటూ
గతం గతః అనుకొని
కృంగిపోక కుమిలిపోక...
మృత్యువుకు భయపడక ముందుకు
దూసుకుపోతాడు...రామబాణంలా