భారతదేశ పారిశ్రామిక,  మౌలిక సదుపాయాల రంగంలో స్వయం సమృద్ధి సాధించడమే లక్ష్యంగా కేంద్ర ప్రభుత్వం   అడుగులు వేస్తోంది. చైనా ప్రభుత్వం టన్నెల్ బోరింగ్ యంత్రాల(టీబీఎమ్) ఎగుమతులపై   నిబంధనలు, నియంత్రణలు విధించిన వేళ, దేశీయంగానే అత్యున్నత సాంకేతిక పరిజ్ఞానంతో కూడిన యంత్రాలను తయారు చేసుకుంటామని కేంద్ర వాణిజ్య, పరిశ్రమల శాఖ మంత్రి పీయూష్ గోయల్  ప్రకటించారు. 

విదేశీ శక్తుల ముందు తలవంచే ప్రసక్తే లేదని, అవసరమైన పరికరాలను మన దేశంలోనే స్వయంగా ఉత్పత్తి చేసుకునే సత్తా భారత్‌కు ఉందని   ధీమా వ్యక్తం చేశారు. ఢిల్లీలోని కిరోరి మల్ కళాశాలలో జరిగిన  యంగ్ లీడర్స్ డిస్కోర్స్ ఫోరమ్ లో ఆయన ఈ వ్యాఖ్యలు చేయడం  ప్రాధాన్యత సంతరించుకుంది.   ఒక్కసారి గతంలోకి వెడితే..  స్వాతంత్ర్యం వచ్చిన నాటి నుంచి దేశ పారిశ్రామిక విధానంలో విదేశీ దిగుమతులపై ఆధారపడటం అనే అంశంపై ఎన్నో చర్చలు జరిగాయి. 1991 ఆర్థిక సరళీకరణ తర్వాత దేశంలో మౌలిక వసతుల నిర్మాణం వేగవంతమైనప్పటికీ, అందుకు అవసరమైన భారీ యంత్రాలు, సాంకేతిక పరిజ్ఞానం కోసం ఇతర దేశాల వైపు చూడాల్సిన పరిస్థితి  తొలగిపోలేదు. 

సొరంగాలు తవ్వడానికి ఉపయోగించే టన్నెల్ బోరింగ్ యంత్రాలు దీనికి   ఉదాహరణగా నిలుస్తున్నాయి. దాదాపు 3,000 టన్నుల బరువైన ఈ భారీ యంత్రాలు మెట్రో రైల్వే ప్రాజెక్టులు, హైవేలు,  సరిహద్దు ప్రాంతాల కనెక్టివిటీకి అత్యంత కీలకం. గతంలో జర్మనీకి చెందిన హెరెన్క్నెక్ట్ కంపెనీ యంత్రాల సరఫరాలో తలెత్తిన కస్టమ్స్ అడ్డంకుల కారణంగా ముంబై, అహ్మదాబాద్ బుల్లెట్ రైలు,  ఢిల్లీ మెట్రో వంటి కీలక ప్రాజెక్టులపై ప్రభావం పడింది.   ఈ పరిణామాల నేపథ్యంలో విదేశీ సాంకేతికతపై పూర్తిగా ఆధారపడటం ఎంత ప్రమాదకరమో దేశానికి స్పష్టమైంది.   ఇటీవల చైనా వాణిజ్య మంత్రిత్వ శాఖ టన్నెల్ బోరింగ్ యంత్రాలు, కట్టర్ హెడ్లు, మెయిన్ డ్రైవ్ లు, అలాగే   హై ఆల్టిట్యూడ్ కాంక్రీట్ స్ప్రే యంత్రాలపై ఎగుమతి ఆంక్షలు విధించింది. నియంత్రణలు ప్రకటించింది. ఇది పూర్తి నిషేధం కాకపోయినా, డ్యూయల్ యూజ్ చట్రం కింద లైసెన్స్ విధానాన్ని అమల్లోకి తేవడం ద్వారా సరఫరా వ్యవస్థను నియంత్రించింది. ఈ సవాళ్లను ఎదుర్కొనేందుకు భారత్ ప్రత్యామ్నాయ మార్గాలపై దృష్టి సారించింది. చెన్నై,  బెంగళూరులోని ప్లాంట్లలో ఇప్పటికే సొంతంగా యంత్రాల తయారీ ప్రారంభమైందని, భవిష్యత్తులో మరింత పెద్ద పరిమాణంలో గల యంత్రాలను తయారు చేసే సామర్థ్యాన్ని సంతరించుకుంటున్నామని రైల్వే మంత్రి అశ్విని వైష్ణవ్ వెల్లడించారు. 

అయితే..  తయారీ రంగంలో పూర్తిగా స్వయంప్రతిపత్తి సాధించాలంటే కేవలం అసెంబ్లింగ్ మాత్రమే కాకుండా, కీలక భాగాలను కూడా దేశీయంగానే ఉత్పత్తి చేయాల్సిన అవసరం ఎంతైనా ఉంది.   మరోవైపు, ఎలక్ట్రిక్ వాహనాలు,  ఎలక్ట్రానిక్స్ రంగానికి   కీలకమైన రేర్ ఎర్త్ ఎగుమతులపై చైనా ఆంక్షలు విధించినప్పుడు ప్రభుత్వం ఎవరి సహాయంకోసం ఎదురుచూడలేదని మంత్రి పీయూష్ గోయల్ గుర్తుచేశారు. దేశీయ స్టార్టప్‌లను ప్రోత్సహించి, రేర్ ఎర్త్ దిగుమతులు లేకుండానే మోటార్లను తయారు చేసే నూతన ఆవిష్కరణలకు శ్రీకారం చుట్టామని గుర్తు చేశారు. భారత యువత, పారిశ్రామికవేత్తలు సాంకేతిక లోపాలను అధిగమించి సరికొత్త ప్రత్యామ్నాయాలను అన్వేషిస్తున్నారని, ఇది దేశ భవిష్యత్తుకు శుభపరిణామమని విశ్లేషకులు అంటున్నారు. ప్రభుత్వ మద్దతుతో వస్తున్న ఈ స్టార్టప్ ఆవిష్కరణలు రాబోయే రోజుల్లో దేశ పారిశ్రామిక ముఖచిత్రాన్ని పూర్తిగా మార్చేయగలవని చెబుతున్నారు.   

ఇది కూడా చదవండి: రక్షణ రంగంలో ఆత్మనిర్భర్ దూకుడు: గ్లోబల్ లీడర్‌షిప్ వైపు భారత్ అడుగులు.!

అయితే.. ఈ స్వావలంబన ప్రయాణంలో వాస్తవాలను గుర్తించి అడుగులు వేయాల్సిన అవసరం ఉందని ఆర్థిక నిపుణులు సూచిస్తున్నారు. ప్రస్తుతం తయారవుతున్న యంత్రాలలో కొంత భాగం మాత్రమే స్వదేశీ పరిజ్ఞానంతో కూడుకున్నదని, హైడ్రాలిక్స్,  ఎలక్ట్రానిక్ కంట్రోల్ సిస్టమ్స్ వంటి కీలకమైన అంశాలలో ఇంకా దిగుమతులపై ఆధారపడాల్సి వస్తోందని నివేదికలు చెబుతున్నాయి. చైనా నుంచి దిగుమతులు,  వాణిజ్య లోటు పెరుగుతున్న తరుణంలో, కేవలం ప్రకటనలకే పరిమితం కాకుండా క్షేత్రస్థాయిలో ఉత్పత్తి సామర్థ్యాన్ని, నాణ్యతను,  పరిశోధనా రంగాన్ని బలోపేతం చేసుకోవడం చాలా ముఖ్యం. నాణ్యమైన ఉత్పత్తులు, సరసమైన ధరలు,  సకాలంలో డెలివరీ అందించగలిగినప్పుడే నిజమైన స్వావలంబన సాధ్యమవుతుందని పరిశ్రమ వర్గాలు భావిస్తున్నాయి.   

భవిష్యత్తులో ఈ విధానాలు విజయవంతమైతే దేశీయ మౌలిక సదుపాయాల ప్రాజెక్టులకు ఎటువంటి అంతరాయాలు ఏర్పడకుండా ఉంటాయని అంచనా వేస్తున్నారు. విదేశీ ఎగుమతి నిబంధనల కారణంగా ప్రాజెక్టులు నిలిచిపోయే దుస్థితి తొలగిపోవడంతో పాటు, దేశంలోనే ఉపాధి అవకాశాలు పెరుగుతాయి. పారిశ్రామికంగా భారత్ కేవలం దిగుమతి చేసుకునే దేశంగా కాకుండా, భవిష్యత్తులో ప్రపంచ దేశాలకు యంత్రాలను ఎగుమతి చేసే స్థాయికి ఎదగాలన్నదే ప్రభుత్వ లక్ష్యంగా కనిపిస్తోంది. ఈ స్వావలంబన ప్రయాణంలో ఎదురయ్యే సవాళ్లను సమర్థవంతంగా ఎదుర్కొంటూ, శాస్త్ర సాంకేతిక రంగాలలో అగ్రగామిగా నిలవడానికి భారత్ శరవేగంగా అడుగులు వేస్తోంది.   

మీకు నచ్చవచ్చు:  అస్థిత్వ సంక్షోభం నుంచి అజేయ ఆర్థిక శక్తిగా.. ఇండియా ప్రస్థానం.!

గ్లోబల్ ఎకానమీ వృద్ది అంచనాలు: అగ్రస్థానంలో ఇండియా.!

-సీతారాం కంఠంనేని 

ఈ విశ్లేషణ మీకు నచ్చినట్లయితే, దయచేసి మా  https://TeluguOne.com  పోర్టల్‌ను అనుసరించండి, మీ స్నేహితులతో పంచుకోండి, అలాగే మీ విలువైన అభిప్రాయాలను తెలియజేయండి.   

[Tunnel boring machines, statement by Piyush Goyal, China's export restrictions, Atmanirbhar Bharat, rare earths, TeluguOne]