TeluguOne Health
● # Tweets

Download the TeluguOne App

Choose your platform to continue

ఆన్‌లైన్ ఫార్మసీలపై టీజీ సేఫ్ కొరడా: 23 షాపుల లైసెన్సులు రద్దు.!

Published on: Tue Nov 17, 2026 8:18AM

తెలంగాణలో ఆన్‌లైన్ మెడిసిన్ డెలివరీ ప్లాట్‌ఫామ్‌లతో అనుసంధానమై పనిచేస్తున్న మెడికల్ షాపులపై అధికారులు కొరడా ఝుళిపించారు.  రాష్ట్రంలో ఆన్‌లైన్ ఫార్మసీ వేదికల ద్వారా జరుగుతున్న మందుల విక్రయాలపై తెలంగాణ స్టాండర్డ్స్ అథారిటీ ఫర్ ఫుడ్ అండ్ ఎసెన్షియల్ డ్రగ్స్ (టీజీ సేఫ్)  దాడులు నిర్వహించారు.  ఔషధ విక్రయాలకు సంబంధించిన చట్టపరమైన నిబంధనలను  ఉల్లంఘించినట్లు తేలడంతో, ఆన్‌లైన్ డెలివరీ ప్లాట్‌ఫామ్‌లతో భాగస్వామ్యం కలిగి ఉన్న మొత్తం 23 మెడికల్ షాపుల లైసెన్సులను అధికారులు సస్పెండ్ చేశారు. 

రాష్ట్రవ్యాప్తంగా డ్రగ్స్ వింగ్,  ఎన్‌ఫోర్స్‌మెంట్ వింగ్ పోలీసు శాఖల అధికారులు సంయుక్తంగా  నిర్వహించిన  ప్రత్యేక ఎన్‌ఫోర్స్‌మెంట్ డ్రైవ్‌లో భాగంగా మార్కెట్లో చలామణిలో ఉన్న ప్రముఖ ఆన్‌లైన్ ఫార్మసీ సంస్థలైన టాటా 1ఎంజీ, నెట్‌మెడ్స్, జెప్టో, అపోలో 24/7, మెడ్‌ప్లస్ మార్ట్ మరియు ఇన్‌స్టామార్ట్ వంటి డిజిటల్ ప్లాట్‌ఫామ్‌లతో ఒప్పందాలు కుదుర్చుకుని మందులు సరఫరా చేస్తున్న వివిధ ఫార్మసీలలో తనిఖీలు నిర్వహించారు. డిజిటల్ మాధ్యమాల ద్వారా మందులను ఇళ్లకు చేరవేస్తున్న క్రమంలో నిబంధనలు సక్రమంగా పాటిస్తున్నారా లేదా అనే అంశంపై ఈ తనిఖీలు జరిగాయి.

ఈ  తనిఖీల్లో భాగంగా మొత్తం 23 సంస్థల లైసెన్సులపై టీజీ సేఫ్ అధికారులు  చర్యలు తీసుకున్నారు. వీటిలో 15 మెడికల్ షాపుల లైసెన్సులను తదుపరి ప్రత్యేక ఉత్తర్వులు వెలువడే వరకు పూర్తిగా రద్దు చేయగా, మరో 8 షాపుల లైసెన్సులను నిర్దుష్ట కాలపరిమితి పాటు సస్పెండ్ చేశారు. అంతేకాకుండా, నిబంధనలను పాటింపు విషయంలో స్వల్ప లోపాలు వెలుగుచూసిన మరో 9 మెడికల్ షాపుల యాజమాన్యాలకు  హెచ్చరికలు జారీ చేశారు. 

1940 నాటి డ్రగ్స్ అండ్ కాస్మెటిక్స్ చట్టం నిర్దేశించిన నిబంధనల ప్రకారం, ఏ రూపంలో మందులు విక్రయించినా వైద్యుల లేటెస్ట్  ప్రిస్క్రిప్షన్ తప్పనిసరిగా ఉండాలి. అలాగే, దుకాణాల నిర్వహణ సమయంలో అర్హత కలిగిన రిజిస్టర్డ్ ఫార్మసిస్ట్ పర్యవేక్షణ ఉండాలి. అలాగే స్టాక్   అమ్మకాలకు సంబంధించిన రికార్డులను పక్కాగా నిర్వహించాలి.  అయితే ఆన్‌లైన్ డెలివరీల విషయంలో  ఈ నిబంధనలను అనేక దుకాణాలు గాలికొదిలేస్తున్నట్లు విజిలెన్స్ తనిఖీల్లో వెల్లడైంది.

ఇది కూడా చదవండి: పుల్లారెడ్డి స్వీట్స్ లైసెన్స్ సస్పెండ్ చేసిన టీజీ సేఫ్: హైదరాబాద్ స్వీట్ షాపులపై తనిఖీలు.!

భవిష్యత్తులోనూ ఇటువంటి అక్రమ విక్రయాలు పునరావృతం కాకుండా ఉండేందుకు అధికారులు   చర్యలు చేపట్టారు. ఎవరైనా నిబంధనలకు విరుద్ధంగా ఆన్‌లైన్ లేదా ఇతర మార్గాల ద్వారా చట్టవిరుద్ధంగా మందులను విక్రయిస్తున్నట్లు అనుమానాలుంటే,  ప్రజలు నేరుగా తమ ఫిర్యాదులను తెలియజేయవచ్చని టీజీ సేఫ్  వెల్లడించింది. ఇందుకు సంబంధించి ప్రత్యేకంగా ఏర్పాటు చేసిన టోల్-ఫ్రీ హెల్ప్‌లైన్ నంబర్ 1800-599-6969 ద్వారా ప్రజలు తమ ఫిర్యాదులు నమోదు చేయవచ్చని తెలిపింది.

ఈ టోల్-ఫ్రీ సేవలన్నీ ప్రతి పనిదినంలో ఉదయం 10:30 గంటల నుంచి సాయంత్రం 5:00 గంటల వరకు నిరంతరం అందుబాటులో ఉంటాయని అధికారులు తెలిపారు. ప్రజారోగ్య రక్షణే ధ్యేయంగా రాబోయే రోజుల్లో రాష్ట్రవ్యాప్తంగా ఆన్‌లైన్,  ఆఫ్‌లైన్ మెడికల్ షాపులపై తనిఖీలను   ముమ్మరం చేయనున్నట్లు టీజీ సేఫ్ అధికారులు పేర్కొన్నారు.   నిబంధనలను ఉల్లంఘించే   ఫార్మసీలను కూడా ఉపేక్షించేది లేదని హెచ్చరించారు.

మీకు నచ్చవచ్చు: హోటళ్ల లైసెన్సులు రద్దు: ఒక ఫార్సేనా.. ఫుడ్ సేప్టీ అధికారులది ఉత్తుత్తి హడావుడేనా.?

23 సంస్థలకు నోటీసులు, మూడు సంస్థల FSSAI లైసెన్సులు సస్పెండ్..!


[TG Safe, online pharmacies Telangana, medical shops, license suspended, TeluguOne]