జర భద్రం అలా.. పరిగెట్టకు రా..!!
posted on Jun 23, 2022 2:13PM
ప్రధాని, ముఖ్యమంత్రికి లేదా ఎవరన్నా ప్రముఖుడికి జడ్ కేటగిరీ సెక్యూరిటీ వుంటుంది. శత్రువుల నుంచో, ప్రత్యర్థుల నుంచో ఉన్న ప్రాణాపాయం నుంచి వారిని తప్పించడానికి. పిల్లలు నడక నేరుస్తున్న క్రమంలో వారు కిందపడతారేమోనని ఇంట్లో ఎవరో ఒకరు వెన్నంటే వుంటూ రక్షణ కల్పిస్తారు. పిల్లలను స్కూల్లో వేయగానే తల్లిదండ్రులు మొదట కొన్ని రోజులు పిల్లలతో పాటే వారికి రక్షణగా బడికి వెళ్లడం చూస్తూంటాం. కానీ లోకంలో ఏనుగుల మంద తమ పిల్లలకు(గున్న ఏనుగులకు) ఇచ్చే రక్షణ ఎవరూ ఎవరికీ కల్పించరేరన్నది వాటిని గమనిస్తే అవగతమౌతుంది. ఇది జడ్ మూడు ప్లస్ల సెక్యూరిటీ!!చిన్నారి ఏనుగు పిల్ల నడక నేర్చినా సరే దానికి ఏకంగా మూడు నాలుగు ఏనుగులు రక్షణగా వుంటాయి. పిల్ల ఏనుగు మాత్రం వాటి రక్షణకు కాస్తంత ఇబ్బంది పడుతుంటుంది. తనని ముందు నడిపించవచ్చుగా అని తొందరపాటూ ప్రదర్శిస్తుంది. పెద్ద ఏనుగులు మాత్రం దాన్ని తొండంతో, కాళ్లతో అడ్డుకుంటాయి. ప్రమాదాల్లో చిక్కుకోకుండా కాపాడుతుంటాయి.జడ్ ప్లస్లకు మించిన ఈ ఏనుగుల రక్షణ దృశ్యాన్ని 38 సెకండ్ల మేరకు వీడియో తీసి ట్విటర్లో అందిం చారు అటవీశాఖ అధికారి సుశాంత్ నందా. మనుషుల్లాగానే ఏనుగుల మధ్యా ఆ ప్రేమాను బంధాలు మెండుగా వుంటాయి. ఏనుగుల మందలో వున్న ఏనుగులన్నీ మందలోని గున్న ఏనుగును సొంత బిడ్డగానే భావిస్తాయి.