విశాఖపట్నం వేదికగా రెండు రోజుల పాటు జరిగిన  సీఐఐ భాగస్వామ్య సదస్సును అద్భుతంగా విజయవంతం చేయడంలో కీలకంగా వ్యవహరించిన  ప్రభుత్వ అధికారులు, ఉద్యోగులు,   పోలీసు సిబ్బంది, పారిశుద్ధ్య సిబ్బందికి రాష్ట్ర ప్రభుత్వం ప్రత్యేకంగా అభినందనలు తెలిపింది.  ఈ అభినందన కార్యక్రమంలో ముఖ్యమంత్రి  నారా చంద్రబాబు నాయుడకు పాల్గొని ప్రసంగించారు.  అంతర్జాతీయ స్థాయి సదస్సును ఎటువంటి లోటుపాట్లు లేకుండా నిర్వహించారంటూ ప్రశంసించారు. 

గత కొంతకాలంగా ప్రభుత్వ యంత్రాంగం అవిశ్రాంతంగా పనిచేస్తోందని గుర్తు చేశారు. ఇటీవల జరిగిన స్థానిక ఎన్నికల విధులు, అర్నాబ్,  మురసు తుఫాన్లు రాష్ట్రాన్ని తాకిన సమయంలో అధికారులు, సిబ్బంది రేయింబవళ్లు కష్టపడి ప్రజలకు అండగా నిలిచారని ప్రశంసించారు. ఆ అలసటను సైతం లెక్కచేయకుండా, వెంటనే సీఐఐ భాగస్వామ్య సదస్సు ఏర్పాట్లలో నిమగ్నమై దానిని ఘనవిజయం చేయడం అంకిత భావానికి నిదర్శనంగా చంద్రబాబు అభివర్ణించారు.

అన్ని విభాగాల అధికారులు, సిబ్బంది ఒకే కుటుంబంలా సమష్టి స్ఫూర్తితో పనిచేయడం వల్లే ఈ సదస్సు ఇంతటి  స్థాయిలో సక్సెస్ అయ్యిందన్నారు.  దేశ, విదేశాల నుంచి విచ్చేసిన ప్రముఖులు, పారిశ్రామికవేత్తలను విశేషంగా ఆకట్టుకునే రీతిలో సదస్సు ప్రాంగణాన్ని   సుందరంగా తీర్చిదిద్దారనీ, భద్రతా ఏర్పాట్లు కూడా ఎటువంటి లోటుపాట్లూ లేకుండా ఉన్నాయని పొగిడారు.  

భవిష్యత్తులో నిర్వహించబోయే జాతీయ, అంతర్జాతీయ స్థాయి సదస్సులకు విశాఖ సీఐఐ సదస్సు ఒక సరికొత్త బెంచ్ మార్క్‌గా నిలిచిందని ముఖ్యమంత్రి వ్యాఖ్యానించారు. సదస్సు జరిగిన రోజుల్లో విశాఖ నగరాన్ని అత్యంత పరిశుభ్రంగా, సుందరంగా ఉంచడంలో అహర్నిశలు శ్రమించిన పారిశుద్ధ్య కార్మికుల సేవలను సీఎం ప్రత్యేకంగా కొనియాడారు. వారి కృషి వల్లే అతిథులందరూ నగర వాతావరణాన్ని, పరిశుభ్రతను మెచ్చుకున్నారని తెలిపారు.

ఇది కూడా చదవండి:  ఏపీలో ల్యాప్‌టాప్, సర్వర్ తయారీ యూనిట్: లోకేష్ ప్రతిపాదనకు డిక్సన్ టెక్నాలజీ సానుకూల స్పందన.!

సాధారణంగా ఇలాంటి భారీ అంతర్జాతీయ సదస్సుల వెనుక తెరవెనుక కష్టపడే క్షేత్రస్థాయి సిబ్బంది పాత్ర ఎంతో కీలకమని, వారిని గుర్తించి అభినందించడం ద్వారా యంత్రాంగంలో మరింత ఉత్సాహం నింపవచ్చని ప్రభుత్వం భావించింది. ముఖ్యమంత్రి స్వయంగా వచ్చి తమ కష్టాన్ని గుర్తించడంతో అధికారులు, ఉద్యోగులు, పారిశుద్ధ్య కార్మికులు హర్షం వ్యక్తం చేశారు.

ఈ కార్యక్రమంలో రాష్ట్ర మంత్రులు నారా లోకేష్, కొండపల్లి శ్రీనివాస్, డోలా శ్రీ బాల వీరాంజనేయ స్వామి, నారాయణ, ప్రభుత్వ ప్రధాన కార్యదర్శి సాయి ప్రసాద్ తదితరులు పాల్గొన్నారు. ఈ ప్రశంస, ఈ అభినందన.. రానున్న రోజుల్లో అధికారులు, ఉద్యోగులూ ఇదే స్ఫూర్తితో పని చేయడానికి స్ఫూర్తిగా నిలుస్తుందని పరిశీలకులు విశ్లేషిస్తున్నారు. ఆంధ్రప్రదేశ్ అభివృద్ధి పథంలో అధికారులు, ఉద్యోగుల సమన్వయం మరింత వేగాన్ని పెంచుతుందని  అంటున్నారు.

మీకు నచ్చవచ్చు: దేవాంశ్ సినిమాల్లోకి వెడతాడేమోనని భయం: లోకేష్ సరదా వ్యాఖ్యలు తెగ వైరల్.!

ఏపీలో కోకో సాగుకు కొత్త ఊపు.. మోండెలేజ్‌తో సీఎం చంద్రబాబు కీలక ప్రతిపాదన.!

[CBN,  Appreciation, CIISuccess,  Staff Felicitation, Sanitation Workers, TeluguONe]