మొగుణ్ణి కొట్టి మొగసాలుకి ఎక్కినట్టుగా వుంది తెనాలి వైసీపీ నాయకుల వ్యవహారం. ఈ వ్యవహారానికి మద్దతు ఇస్తున్న పోలీసుల వ్యవహార శైలి కూడా విచిత్రంగా వుంది. ఈరోజు తెనాలిలో ఓటు వేయడానికి వైసీపీ అభ్యర్థి అన్నాబత్తుని శివకుమార్ క్యూలో నిల్చోకుండా డైరెక్ట్.గా వెళ్ళిపోతున్నారు. అది చూసిన గొట్టిముక్కల సుధాకర్ అనే ఓటరు మీరు కూడా క్యూలో రావాలని రిక్వెస్ట్ చేశారు. అంతే శివకుమార్‌కి ఎక్కడ లేని కోపం ముంచుకుని వచ్చేసింది. ఒక్కసారిగా సుధాకర్ మీదకి దాడి చేసి ఆయన చెంపమీద కొట్టారు. దాంతో రియాక్ట్ అయిన సుధాకర్ కూడా ఎమ్మెల్యే శివకుమార్ చెంప ఛెళ్ళుమనిపించారు. అది చూసిన వైసీపీ ఎమ్మెల్యే పక్కనే వున్న గూండాలు సుధాకర్ మీద దాడి చేసి దారుణంగా కొట్టారు. దాంతో సుధాకర్ తీవ్రంగా గాయపడ్డారు. అప్పుడు తీరిగ్గా ఎంటరైన పోలీసులు ఏంచేయాలి? మొదట చెయ్యి చేసుకున్న ఎమ్మెల్యేని, సుధాకర్ మీద దాడి చేసిన వైసీపీ గూండాలని అరెస్టు చేయాలి. కానీ వాళ్ళు సుధాకర్‌ని అరెస్టు చేసి పోలీస్ స్టేషన్‌కి తరలించారు. తీవ్రంగా గాయపడిన సుధాకర్‌ని మొదట ఆస్పత్రికి తీసుకెళ్ళి చికిత్స చేయించాలన్న కనీస బాధ్యత కూడా లేకుండా తెనాలి పోలీసులు వ్యవహరించారు. వైసీపీ నాయకులతో కుమ్మక్కై మీది తెనాలి... మాది తెనాలి.. మనది తెనాలి అన్నట్టుగా వ్యవహరిస్తున్నారు. ఎమ్మెల్యే తీరు పట్ల, పోలీసుల తీరు పట్ల తెనాలిలో విమర్శలు వెల్లువెత్తుతున్నాయి. ఓటర్ని కొట్టడం అనే విషయాన్ని తెనాలి ఓటర్లు చాలా సీరియస్‌గా తీసుకుంటున్నారు.