తెలుగు సినిమా రంగంలో గతంలో గోల్డెన్ ఏజ్ నడిచింది. ఇప్పుడు మిగతా అన్ని ఏజ్‌ దాటుకుంటూ వచ్చి ఇప్పుడు ‘లీకేజ్’ నడుస్తోంది. తెలుగు సినిమాలకు సంబంధించిన వీడియోలు లీక్ కావడం ఈమధ్యకాలంలో మామూలైపోయింది. మొన్నీమధ్యే ‘బాహుబలి’ సినిమాకి సంబంధించిన 13 నిమిషాల వీడియో లీక్ అయింది. సినిమాలోనే అతి కీలకమైన ఆ వీడియో ఫుటేజ్‌ని గ్రాఫిక్స్ సంస్థకి చెందిన మాజీ ఉద్యోగి ఒకరు లీక్ చేశారని బయటపడింది. ‘బాహుబలి’ వీడియో లీక్ అయిన వేడి ఇంకా చల్లారకముందే ఇప్పుడు మరో లీకేజ్ బయటపడింది. అనుష్క ప్రధాన పాత్రధారిగా నటిస్తుండగా గుణశేఖర్ స్వీయ దర్శకత్వంలో నిర్మిస్తున్న ‘రుద్రమదేవి’ ఆడియో లీక్ అయింది. ఈ సినిమా పాటలు ఆడియో విడుదలకు ముందే ఇంటర్నెట్‌లో హల్‌చల్ చేస్తున్నాయి. ఈ సినిమాకి ఇళయరాజా సంగీతాన్ని అందించారు. ‘రుద్రమదేవి’ సంగీతం ఎవరిద్వారా ఇంటర్నెట్‌లో లీక్ అయిందో ఇంకా తెలియరాలేదు. ఇటీవల లీకేజ్ ప్రాబ్లమ్ ఎదుర్కొన్న ‘బాహుబలి’, ‘రుద్రమదేవి’... ఈ రెండు సినిమాల్లోనూ అనుష్క హీరోయిన్ కావడం విశేషం.