భారతదేశం అంటేనే సంస్కృతి సంప్రదాయాలకు నిలయం. మన అచారాలు, సంప్రాదాయాలను చూసే ప్రపంచ దేశాలన్ని మన దేశాన్ని గౌరవిస్తాయి. మన సంప్రదాయానికి ప్రతీక చీర. మహిళలు చీర కట్టులో మరింతగా మెరిసిపోతారు. శారీ ధరించిన మన మహిళలకు విదేశాల్లో సైతం మంచి గౌరవం లభిస్తుంది. అమెరికా దేశస్తులు సైతం మన చీర కట్టును చూసి ముగ్దులవుతారు. అలాంటిది దేశ రాజధానిలో మాత్రం చీర కట్టుకున్నందుకు ఓ మహిళను రెస్టారెంట్ లోకి అనుమతించలేదు. రెస్టారెంట్ లోకి అనుమతించబడని ఆ మహిళ సాధారణ వ్యక్తి కూడా కాదు.. ఆమె జర్నలిస్ట్. ఈ ఘటన ఇప్పుడు సోషల్ మీడియాలో రచ్చగా మారింది. 

ఖేల్ గావ్‌లో ఉన్న ఆక్విలా అనే రెస్టారెంట్ వద్ద ఈ ఘటన జరిగింది.  ఢిల్లీ రెస్టారెంట్ నిర్వాహకులపై నెటిజన్లు ఓ రేంజ్ లో ఫైరవుతున్నారు.వివరాల్లోకి వెళితే.. ఢిల్లీకి చెందిన  జర్నలిస్ట్ అనితా ఛౌదరి తన కుమార్తె పుట్టినరోజును ఘనంగా జరపాలని భావించింది. ఇంటికి దగ్గరలో ఉన్న రెస్టారెంట్లో టేబుల్ బుక్ చేసింది. ఏర్పాట్లన్నీ చేసుకుని రెస్టారెంట్‌కు వెళ్లింది. తీరా అక్కడకు వెళ్లాక కుమార్తెను లోపలకు అనుమతించిన సిబ్బంది ఆమెను మాత్రం ఆపేశారు. అదేంటని ప్రశ్నిస్తే ఆమె చీర కట్టుకొని ఉందని, రెస్టారెంట్లోకి కేవలం స్మార్ట్ క్యాజువల్స్ వేసుకున్న వారికే అనుమతి ఉందని చెప్పారు. 

తన చీర కూడా క్యాజువల్ డ్రస్సే కదా అని జర్నలిస్ట్ వాదించినా రెస్టారెంట్ సిబ్బంది అంగీకరించలేదు. రెస్టారెంట్ మేనేజర్ కూడా  తన సిబ్బందినే సమర్థించాడు. ఆమెను లోపలకు అనుమతించడానికి ససేమిరా అన్నారు. దీంతో బుక్ చేసిన టేబుల్ వదిలేసుకొని ఇంటికి తిరిగెళ్లిపోవాల్సి వచ్చింది అనిత. ఈ మొత్తం వివాదాన్ని వీడియో తీసిన ఆమె సోషల్ మీడియాలో పంచుకున్నారు. చీర స్మార్ట్ క్యాజువల్ కాదని తనను రెస్టారెంట్లోకి అనుమతించలేదని, దీని వల్ల తన కుమార్తె పుట్టినరోజు ప్రోగ్రాం చెడిపోయిందని అనిత ఆగ్రహం వ్యక్తం చేశారు. దీంతోపాటు తను వచ్చిన విధానాన్ని చెప్పేందుకు ఒక సెల్ఫీ కూడా షేర్ చేశారు.

ఈ వీడియో చూసిన నెటిజన్లు ఆక్విలా రెస్టారెంటుపై మండిపడుతున్నారు. ఒకరైతే ఈ రెస్టారెంట్‌కు ప్రతిచోటా చెత్త రేటింగే ఉందని చెప్పారు. గూగుల్‌లో 1.1/5 రేటింగ్ ఉండగా, జొమాటోలో 2/5 రేటింగ్ ఉందని చెప్పిన సదరు యూజర్.. ఈ రెస్టారెంట్ ఇలా తప్పు చేయడం ఇదేమీ మొదటిసారి కాదని వెల్లడించారు. పాత రివ్యూలు చూస్తే ఈ విషయం అర్థమవుతుందని తెలిపారు. అనిత షేర్ చేసిన వీడియో ప్రస్తుతం తెగ వైరల్ అవుతోంది.