అండర్ వరల్డ్ డాన్ అరుణ్ గావ్లీతో సంబంధాలున్నాయన్న ఆరోపణల మీద బాలీవుడ్ హీరో అర్జున్ రామ్‌పాల్‌కి ముంబై పోలీసులు నోటీసులు జారీ చేశారు. అరుణ్ గావ్లీ లాంటి అండర్ వరల్డ్ డాన్‌ని కలవాల్సిన అవసరం ఏమొచ్చిందో చెప్పాలని ఆ నోటీసులలో పేర్కొన్నారు. అర్జున్ రామ్‌పాల్ ప్రస్తుతం ‘డాడీ’ అనే సినిమాలో నటిస్తున్నాడు. ఈ చిత్రంలో ఆయన ఒక డాన్ పాత్రలో కనిపిస్తారు. ఈ డాన్ పాత్రను అరుణ్ గావ్లీని పోలి వుంటుందని తెలుస్తోంది. ఈ పాత్రను రక్తికట్టంచడం కోసం అర్జున్ రామ్‌పాల్ డైరెక్టుగా అరుణ్ గావ్లీనే పరిశీలిస్తే ఓ పనైపోతుంది కదా అనుకున్నాడు. అరుణ్ గావ్లీ కమలాకర్ అనే కార్పొరేటన్ హత్య కేసులో జైల్లో శిక్ష అనుభవిస్తున్నాడు. గత డిసెంబర్‌లో అనారోగ్యంతో కొంతకాలం ఆస్పత్రిలో చికిత్స పొందాడు. ఆ సమయంలో అర్జున్ రామ్‌పాల్ అరుణ్ గావ్లీని కలిసి ఆయనతో మూడు గంటలపాటు చర్చించాడు. కేవలం పాత్ర పోషణకు మాత్రమే తాను అరుణ్ గావ్లీని కలిసినట్టు అర్జున్ రామ్‌పాల్ చెబుతున్నప్పటికీ ముంబై పోలీసులు ఈ అంశాన్ని సీరియస్‌గా తీసుకున్నారు. అర్జున్ రామ్‌పాల్‌కి అరుణ్ గావ్లీతో సన్నిహిత సంబంధాలు ఉండే అవకాశం వుందని భావిస్తున్నారు. అందుకే ఆయనకు నోటీసులు జారీ చేశారు.