గర్భిణీ స్త్రీలు గ్రహణంలో ఏం చేయాలి?

 

ఈ నెల 31న చంద్రగ్రహణం ఉన్న విషయం అందరికీ తెలిసిందే! ఇంట్లో ఎవరన్నా కడుపుతో ఉంటే... వాళ్లు ఈ సమయంలో ఎలాంటి జాగ్రత్తలు తీసుకోవాలి. గ్రహణం సమయంలో అసలు బాత్రూంకి కూడా వెళ్లకూడదని చెప్పే మాటలో నిజం ఎంత తెలుసుకుందామా!

గ్రహణ సమయంలో, అల్ట్రావైలెట్‌ రేస్‌ ఎక్కువగా ఉంటాయన్నది మన పూర్వీకుల నమ్మకం. అందుకని ఈ సమయంలో వీలైనంత వరకూ ఇంటిపట్టునే ఉండాలని అంటారు. ఈ అల్ట్రావైలెట్ కిరణాలు ఆహారపదార్థాలు, నీరు మీద చెడు ప్రభావం చూపుతాయట. అందుకనే ఆహారపదార్థాలు, నీరు ఉంచిన పాత్రలు, పూజాగదుల మీద దర్భలు ఉంచమని చెబుతారు.

ఇక గర్భిణీస్త్రీలు గ్రహణం సమయంలో మరింత జాగ్రత్తగా ఉండాలన్నది పెద్దల మాట. వారి కడుపులో పెరిగే లేత పిండం మీద ఆ గ్రహణకిరణాల ప్రభావం ఉంటుందేమో అని వారి భయం. ఈ భయంతోనే వారు గర్భిణీ స్త్రీలు గ్రహణం చూడకూడదని చెబుతారు. ఇప్పుడంటే ఎటాచ్డ్ బాత్రూంలు వచ్చేశాయి కానీ... పూర్వం బాత్రూంలన్నీ ఇంటి బయటే ఉండేవి. కాలకృత్యాలు తీర్చుకోవాలంటే ఇంటి నుంచి బయటకి రావాల్సిన పరిస్థితి. గ్రహణం సమయంలో ఇలా కూడా బయటకి రావడం ప్రమాదం అని భావించి, ఆ సమయంలో బాత్రూంకి కూడా వెళ్లొద్దని చెప్పేవారు. మారిన కాలంలో ఆ ఆచారాన్ని బలవంతంగా పాటించాల్సిన అవసరం లేదు.

ఇక గర్భిణీ స్త్రీలు గ్రహణం సమయంలో కాయగూరలు తరగకూడదన్నది మరో ఆచారం. కడుపుతో ఉన్నవారు, ఏం చూసినా, ఏం చేసినా... వారి మనసు మీద బలమైన ముద్ర పడుతుంది. ఆ ప్రభావం బిడ్డ మీద కూడా ఉంటుంది. గ్రహణంలాంటి సయయంలో ఈ ప్రభావం మరింత ఎక్కువగా ఉండవచ్చు. ఎందుకంటే జాతకరీత్యా చంద్రుడికి మనసుని ప్రభావం చేసే శక్తి ఉంటుంది. అందుకనే వారిని- పదునైన వస్తువులతో తరగడం, కోయడంలాంటి పనులకు దూరంగా ఉండమని చెబుతారు.

గ్రహణం సమయంలో గర్భిణీ స్త్రీలని నిద్రపొమ్మని చెప్పడం వెనక కూడా బలమైన కారణం కనిపిస్తుంది. గ్రహణం సమయంలో వీలైనంతవరకూ బయటకి వెళ్లకూడదన్నది కదా ఆచారం. ఇలా ఇంటిపట్టునే ఉంటే ఏం తోచదు కాబట్టి, భగవంతుని నామస్మరణ చేసుకోమని చెబుతారు. కడుపుతో ఉన్నవారికి అంత ఓపిక కూడా ఉండదు కాబట్టి, వాళ్లని ప్రశాంతంగా పడుకోమని సూచిస్తుంటారు.  https://www.youtube.com/watch?v=XEgiU_XxEtE