Home » ఈపేజీ మీకోసం » బతుకమ్మ పాట



Facebook Twitter Google
బతుకమ్మ పాట

బతుకమ్మ పాట!

 

 


బతుకమ్మ మీద ఇప్పుడు చాలా పాటలే వినిపిస్తున్నాయి. వాటిలో అనాదిగా జానపదులు పాడుకుంటున్న పాటలలో ఒకటి ఇది. హద్యంగా, లయబద్ధంగా బతుకమ్మ కథని పాటరూపంలో పాడుతూ బతుకమ్మ చుట్టూ ఆడిస్తుందీ పాట. దాదాపు 60 ఏళ్ల క్రితమే కృష్ణశ్రీ అనే రచయిత ఈ పాటని సేకరించి తన ‘పల్లెపదాలు’ పుస్తకంలో ప్రచురించారు.


శ్రీలక్ష్మి దేవియు చందమామ –  సృష్టి బతుకమ్మయ్యె చందమామ
పుట్టినా రీతిచెప్పె    చందమామ – భట్టు నరసింహ కవి    చందమామ
ధరచోళ దేశమున    చందమామ – ధర్మాంగుడను రాజు చందమామ
ఆరాజు భార్యయు    చందమామ – అతి సత్యవతి యండ్రు చందమామ
నూరునోములు నోమి చందమామ – నూరుమందిని గాంచె చందమామ
వారు శూరులయ్యు చందమామ – వైరులచే హతమైరి చందమామ
తల్లిదండ్రులపుడు    చందమామ – తరగనీ శోకమున చందమామ
ధనరాజ్యముల బాసి చందమామ – దాయాదులను బాసి చందమామ
వనితతో ఆ రాజు చందమామ – వనమందు నివసించె చందమామ
కలికి లక్ష్మిని గూర్చి చందమామ – ఘనతపం బొనరించె చందమామ
ప్రత్యక్షమై లక్ష్మి చందమామ – పలికె వరమడుగుమని చందమామ
వినుతించి వేడుచూ చందమామ – వెలది తనగర్భమున చందమామ
పుట్టుమని వేడగా    చందమామ – పూబోణి మది మెచ్చి చందమామ
సత్యవతి గర్భమున చందమామ – జన్మించె మహలక్ష్మి చందమామ
అంతలో మునులునూ చందమామ – అక్కడికి వచ్చిరీ చందమామ
కపిల గాలవులునూ చందమామ – కశ్యపాంగిరసులు చందమామ
అత్రి వశిష్టులూ చందమామ – ఆకన్నియను జూచి చందమామ
బ్రతుకుగనె యీతల్లి చందమామ – బ్రతుకమ్మ యనిరంత చందమామ
పిలుతు రదివరనుండి చందమామ – ప్రియముగా తలిదండ్రి చందమామ
బ్రతుకమ్మ యని పేరు చందమామ – ప్రజలంత అందరూ చందమామ
తాను ధన్యూడంచు చందమామ – తనబిడ్డతో రాజు చందమామ
నిజపట్టణము కేగి చందమామ – నేల పాలించంగ చందమామ
శ్రీమహా విష్ణుండు చందమామ – చక్రాంకుడను పేర చందమామ
రాజు వేషంబున చందమామ – రాజు ఇంటికి వచ్చి చందమామ
ఇల్లింట మనివుండి చందమామ – అతివ బ్రతుకమ్మను    చందమామ
పెండ్లాడి కొడుకులా చందమామ – పెక్కుమందిని గాంచె చందమామ
ఆరువేల మంది చందమామ – అతి సుందరాంగులు చందమామ
ధర్మాంగుడను రాజు చందమామ – తన భార్య సత్యవతి    చందమామ
సరిలేని సిరులతో చందమామ – సంతోషమొందిరీ చందమామ
జగతిపై బ్రతుకమ్మ చందమామ – శాశ్వతంబుగ వెలసె    చందమామ

- నిర్జర.

 


నిజం చెప్పనా
May 31, 2019
జీవితంలో ఏ పోటీ అయినా పరుగు పందెంలా సాగాలి!
Apr 16, 2019
ఆనందీ గోపాల్  జోషి పాశ్చాత్య వైద్యంలో పట్టా పొందిన  మొట్టమొదటి భారతీయ మహిళావైద్యురాలు..
Mar 30, 2019
మన భారతదేశంలో  శాస్త్రీయ నృత్యాలు... ఎనిమిది రకాలు... అవేమిటంటే.....
Mar 22, 2019
ఫిబ్రవరి 21 వ తేదీ ప్రపంచ మాత్రుభాషాదినోత్సవం. ప్రపంచ వ్యాప్తంగా జరుపుకుంటారు. బహుభాషాతనాన్ని, భాషా సాంస్క్రుతిక భిన్నత్వాన్ని గుర్తించేందుకు అవగాహన పొందేందుకు ఈరోజును ప్రపంచ మాత్రుభాషా దినోత్సవంగా.....
Feb 20, 2019
బతుకమ్మ బతుకమ్మ బతుకమ్మా మా ఇంటికి రావమ్మ మురియెంగా...
Oct 15, 2018
మునిగిన జలమును నీవు కరిగి  పవిత్రముగ జేసి నీ గుర్తుగా...
Sep 19, 2018
ఒక చిన్న కథ. ఓ వ్యాపారవేత్త పనిమీద బయల్దేరతాడు...
Sep 5, 2018
తెలుగునాట లాలిపాటలకు కొదవేమీ లేదు. కాలం ఎంత మారినా కూడా...
Sep 3, 2018
తన శివతాండవ కావ్యాన్ని సంగీత సాహిత్య నాట్య త్రివేణీసంగమంగా మలచేందుకు మా అయ్యగారికి స్ఫూర్తినిచ్చినది చిదంబరంలోని
Feb 12, 2018
TeluguOne For Your Business
About TeluguOne