తెలంగాణ పోలీసులపై ప్రశంసల వర్షం... సాహో సజ్జనార్ అంటూ జేజేలు

దిశ నిందితులను ఎన్ కౌంటర్ చేసిన తెలంగాణ పోలీసులపై దేశవ్యాప్తంగా ప్రశంసల వర్షం కురుస్తోంది. జైహో తెలంగాణ పోలీస్... సాహో సజ్జనార్ అంటూ హర్షం వ్యక్తంచేస్తున్నారు. దిశ నిందితులను ఎన్ కౌంటర్ చేయడంతో దేశవ్యాప్తంగా సంబరాలు చేసుకుంటున్నారు. ఒక పండగలా స్వీట్లు పంచుకుంటూ బాణాసంచా పేల్చుతూ సెలబ్రేట్ చేసుకుంటున్నారు. దిశ నిందితుల ఎన్ కౌంటర్ జరిగిన చటాన్ పల్లి ప్రాంతానికి పెద్దఎత్తున చేరుకున్న ప్రజలు, స్థానికులు ...పోలీసులకు జిందాబాద్ లు కొడుతున్నారు. పోలీసులపై పూల వర్షం కురిపిస్తూ స్వీట్లు తినిపిస్తున్నారు. ముఖ్యంగా సైబరాబాద్ పోలీస్ కమిషనర్ సజ్జనార్ పై ప్రశంసల వర్షం కురుస్తోంది. వరంగల్ ఎన్ కౌంటర్ ను రిపీట్ చేసి సజ్జనార్ నిజమైన హీరోగా నిలిచారంటూ జేజేలు పలుకుతున్నారు.