గాంధీ ఆసుపత్రిలో అక్బరుద్దీన్
posted on Jan 8, 2013 11:06AM
ఎట్టకేలకు ఎంఐఎం అక్బరుద్దీన్ ఓవైసీ వైద్య పరీక్షల నిమిత్తం హైదరాబాద్ లోని గాంధీ ఆసుపత్రికి వచ్చారు. వైద్య పరీక్షల నిమిత్తం గాంధీ ఆసుపత్రికి రావాలని ఈ ఉదయం పోలీసులు అక్బరుద్దీన్ నివాసం వద్ద నోటీసులు జారీ చేశారు. తనకు అనారోగ్యంగా ఉన్నందున పోలీసుల ముందు హాజరయ్యేందుకు నాలుగు రోజుల గడువు ఇవ్వాలని అక్బరుద్దీన్ కోర్టు పిటీషన్ దాఖలు చేసిన విషయం తెలిసిందే. ఈ నేపథ్యంలోనే ఆయనకు ఓ సారి వైద్య పరీక్షలు నిర్వహిస్తున్నారు.
గాంధీ ఆసుపత్రిలోని అత్యవసర చికిత్సల విభాగంలో అక్బరుద్దీన్ కు వైద్యులు పరీక్షలు నిర్వహిస్తున్నారు. ఈ పరీక్షల వివరాలు ఈ మధ్యాహ్నం బయటకు వస్తాయి. ఆ తరువాత అరెస్టు మీద నిర్ణయం తీసుకుంటారని తెలుస్తోంది. మరో వైపు అక్బరుద్దీన్ ఇంటి నుండి గాంధీ అసుపత్రి వరకు భారీగా పోలీసులను మోహరించారు. ఎంఐఎం పార్టీ కార్యకర్తలు, నేతలు భారీగా ఆసుపత్రి వద్దకు చేరుకుంటున్నారు.