ట్రాక్ తప్పుతున్న త్రివిక్రమ్
on Jan 23, 2016
త్రివిక్రమ్ - నిర్మాత రాధాకృష్ణ.. వీరిద్దరి రిలేషన్ గురించి ప్రత్యేకంగా చెప్పక్కర్లెద్దు. త్రివిక్రమ్పై ఉన్న అభిమానంతోనే.. రాధాకృష్ణ నిర్మాతగా మారారు. వీరిద్దరి కాంబినేషన్లో జులాయి, సన్నాఫ్ సత్యమూర్తి.. సినిమాలొచ్చాయి. ఇప్పుడు అ..ఆ కీ ఆయనే నిర్మాత. రాధాకృష్ణ సినిమా అంటే త్రివిక్రమ్ రెమ్యునరేషన్ తీసుకోడని టాక్. నిర్మాణ భాగస్వామిగా ఉంటూ.. లాభాల్లో వాటా అందుకొంటాడట. వాళ్లిద్దరిదీ అంత అవినాభావ సంబంధం. అయితే... ఇప్పుడు ఆ అనుబంధానికి బీటలు వారాయనటి టాక్. త్రివిక్రమ్ వ్యవహార శైలి.. రాధాకృష్ణకు బొత్తిగా నచ్చడం లేదని, అఆ బడ్జెట్ని రోజురోజుకీ పెంచుకొంటూ పోవడమే అందుకు కారణమని తెలుస్తోంది.
అంతేకాదు.. సినిమాపై త్రివిక్రమ్ సరిగా దృష్టి పెట్టడం లేదని, సినిమా అంటే ఇతరత్రా వ్యవహారాలే.. త్రివిక్రమ్కి ఎక్కువ అవుతున్నాయని.. ఈ విషయంలో రాధాకృష్ణకూ, త్రివిక్రమ్కీ మధ్య గ్యాప్ వచ్చిందని తెలుస్తోంది. త్రివిక్రమ్ వ్యవహార శైలి నచ్చకే.. ఈ సినిమా బృందం నుంచి మొన్న కళా దర్శకుడు, నిన్న సంగీత దర్శకుడు బయటకు వెళ్లిపోయారని సమాచారం. ఈ ప్రభావం అఆ రిజల్ట్ పై పడే అవకాశం ఉంది. సినిమాపై అత్యంత ఫ్యాషన్ చూపించే త్రివిక్రమ్కి ఇంతలోనే ఏమైందో మరి?!