ప్రభాస్ తో సినిమా.. మూడు నెలలు జైలు.. సంజన సంచలన జర్నీ!
on Oct 13, 2025
బిగ్ బాస్ సీజన్ 9లో ప్రముఖ సినీ నటి సంజనా గల్రానీ తనదైన ఆట తీరుతో ఆకట్టుకుంటోంది. సోషల్ మీడియాలో ఆమెకు బాగానే సపోర్ట్ లభిస్తోంది. బిగ్ బాస్-9 లో సంజన ప్రయాణం ఎలా సాగుతుందనేది కాసేపు పక్కన పెడితే.. నిజ జీవిత ప్రయాణంలో మాత్రం ఆమె ఎన్నో ఒడిదుడుకులు ఎదుర్కొంది. ఓ వైపు పాన్ ఇండియా స్టార్ ప్రభాస్ తో స్క్రీన్ షేర్ చేసుకుంది. మరోవైపు ఒక కేసులో మూడు నెలలు జైలు శిక్ష అనుభవించింది. ఇలా సంజన జీవితంలో విజయాలు, వివాదాలు, విషాదాలు అన్నీ ఉన్నాయి. ఒకసారి ఆమె జర్నీని గుర్తు చేసుకుందాం. (Sanjana Galrani)
బెంగళూరుకి చెందిన సంజనా గల్రానీ అసలు పేరు అర్చనా మనోహర్ గల్రానీ. చిన్నతనం నుంచి ఆమెకి నటనపై ఆసక్తి. చైల్డ్ ఆర్టిస్ట్ గా కొన్ని సినిమాల్లో మెరవడంతో పాటు, ప్రకటనల్లోనూ నటించింది. సంజన మొదట నటించింది తెలుగులోనే కావడం విశేషం. తరుణ్, ఆర్తి అగర్వాల్ జంటగా 2005లో వచ్చిన 'సోగ్గాడు' సినిమాలో నటించింది. అయితే ఇందులో సంజన పాత్రకు ప్రాధాన్యత లేదనే చెప్పాలి. 'సోగ్గాడు' తర్వాత తమిళ, కన్నడ సినిమాలకు పరిమితమైన సంజన.. 2008లో ప్రభాస్, త్రిష జంటగా నటించిన 'బుజ్జిగాడు' సినిమాతో మళ్ళీ తెలుగు ప్రేక్షకులను పలకరించింది. త్రిష చెల్లిగా, ప్రభాస్ మరదలిగా.. ఇందులో ఆమె తనదైన నటనతో మెప్పించింది. సంజన పేరు వింటే.. తెలుగు ప్రేక్షకులను మొదట గుర్తొచ్చేది 'బుజ్జిగాడు' సినిమానే అనడంలో అతిశయోక్తి లేదు.
అయితే 'బుజ్జిగాడు' తర్వాత కూడా సంజనకు స్టార్స్ సినిమాల్లో పెద్దగా అవకాశాలు రాలేదు. దీంతో ఎక్కువగా కన్నడ సినిమాలే చేసిన సంజన.. తెలుగులో కూడా వచ్చిన అవకాశాలను ఉపయోగించుకుంటూ తనకంటూ ప్రత్యేక గుర్తింపు తెచ్చుకుంది. 2008లో ప్రభాస్ సినిమాలో నటించిన ఆమె.. ఎనిమిదేళ్ల తర్వాత మరో బిగ్ స్టార్ పవన్ కళ్యాణ్ సినిమాలో నటించింది. 2016లో వచ్చిన 'సర్దార్ గబ్బర్ సింగ్'లో ఆమె కీలక పాత్ర పోషించింది. తెలుగులో చివరిగా 2017లో విడుదలైన '2 కంట్రీస్' సినిమాలో కనిపించింది.
కన్నడలో పదుల సంఖ్యలో సినిమాలు చేసిన సంజనకు అక్కడ బాగానే క్రేజ్ ఉంది. మొదటి సినిమా 'గండ హెందతి'తోనే నటిగా అందరి దృష్టిని ఆకర్షించింది. ఇక దండుపాళ్యం 2, దండుపాళ్యం 3 సినిమాల్లో చంద్రి పాత్రలో సర్ ప్రైజ్ చేసిందని చెప్పవచ్చు. అలాగే, 'మతే బన్నీ ప్రీత్సోనా' లాంటి సినిమాలకు నటిగా అవార్డులు కూడా అందుకుంది.
సినీ రంగంలో మాత్రమే కాకుండా.. సైక్లింగ్ లోనూ తనదైన ముద్ర వేసింది సంజన. 2015లో, ఆమె ఏకంగా 104 గంటల పాటు సైక్లింగ్ చేసి.. లిమ్కా బుక్ ఆఫ్ వరల్డ్ రికార్డ్స్లో చోటు సంపాదించుకుంది.
సంజన జీవితంలో వివాదాలు కూడా ఉన్నాయి. కన్నడ ఫిల్మ్ ఇండస్ట్రీకి సంబంధించిన డ్రగ్స్ రాకెట్ కేసులో.. కర్ణాటక క్రైమ్ బ్రాంచ్ పోలీసులు, 2020 సెప్టెంబర్ లో సంజనను అరెస్ట్ చేశారు. మూడు నెలలు జైలు జీవితం గడిపిన తర్వాత.. ఆమెకు కోర్టు బెయిల్ ఇచ్చింది.
డ్రగ్స్ కేసు వివాదం తర్వాత సంజనకు సినిమా అవకాశాలు తగ్గిపోయాయి. గత కొన్నేళ్లుగా అడపాదడపా మాత్రమే సినిమాల్లో కనిపిస్తోంది. అలాంటి సంజన.. ఇప్పుడు తెలుగు బిగ్ బాస్ హౌస్ లోకి అడుగుపెట్టింది. నిజానికి సంజనకు బిగ్ బాస్ కొత్త కాదు. బిగ్ బాస్ కన్నడ సీజన్-1 లో ఆమె కూడా ఓ కంటెస్టెంట్. అయితే అప్పుడు రెండు వారాలకే హౌస్ నుంచి బయటకు వచ్చేసింది. ఇప్పుడు తెలుగు బిగ్ బాస్ లో మాత్రం మంచి ప్రభావాన్నే చూపుతోంది. మరి ఫైనల్ కి చేరుతుందేమో చూడాలి.
సంజన పర్సనల్ లైఫ్ విషయానికొస్తే.. 2021లో బెంగళూరుకు చెందిన అజీజ్ పాషా అనే డాక్టర్ ని పెళ్ళి చేసుకుంది. వీరికి ఒక బాబు ఉన్నాడు. ఒక తల్లిగా, అంత చిన్న బాబుని వదిలి ఉండటం కష్టమైనా.. తనని తాను ప్రూవ్ చేసుకోవడం కోసం బిగ్ బాస్ హౌస్ లోకి ఎంట్రీ ఇచ్చింది. ఇక సంజన చెల్లి నిక్కీ గల్రానీ కూడా నటినే కావడం విశేషం. ఆమె 2022లో ప్రముఖ నటుడు ఆది పినిశెట్టిని పెళ్లి చేసుకుంది.
Latest News
Video-Gossips
TeluguOne Service
Customer Service
Live Help 24/7Customer Care
Send your Queries to
