'అవతార్'ని మించేలా 'SSMB29'.. ఏం ప్లాన్ చేశావయ్యా జక్కన్న..!
on Sep 3, 2025
'బాహుబలి', 'ఆర్ఆర్ఆర్' సినిమాలతో అంతర్జాతీయ గుర్తింపు పొందిన దర్శకధీరుడు ఎస్.ఎస్. రాజమౌళి(SS Rajamouli).. తన తదుపరి చిత్రాన్ని సూపర్ స్టార్ మహేష్ బాబు(Mahesh Babu)తో చేస్తున్నారు. మహేష్ కెరీర్ లో 29వ సినిమాగా రూపొందుతోన్న ఈ ప్రాజెక్ట్ కి 'SSMB29' అనేది వర్కింగ్ టైటిల్. కె.ఎల్. నారాయణ అత్యంత భారీ బడ్జెట్ తో నిర్మిస్తున్న ఈ యాక్షన్ అడ్వెంచర్ ఫిల్మ్ లో ప్రియాంక చోప్రా, పృథ్వీరాజ్ సుకుమారన్ ముఖ్య పాత్రలు పోషిస్తున్నారు. ఈ చిత్రంతో హాలీవుడ్ సినిమాలను సవాల్ చేసే స్థాయికి రాజమౌళి ఎదుగుతారని అందరూ బలంగా నమ్ముతున్నారు. అందుకు తగ్గట్టుగానే 'SSMB29'కి సంబంధించిన ఒక్కో అప్డేట్ సినిమాపై అంచనాలను రెట్టింపు చేస్తోంది.
'బాహుబలి'తో పాన్ ఇండియా ట్రెండ్ కి శ్రీకారం చుట్టిన రాజమౌళి.. 'SSMB29'తో పాన్ వరల్డ్ ట్రెండ్ కి శ్రీకారం చుట్టబోతున్నారు. ఈ క్రమంలోనే 'SSMB29' చిత్రాన్ని ఏకంగా 120 దేశాల్లో విడుదల చేయడానికి ప్లాన్ చేస్తున్నారు. ఈ విషయాన్ని కెన్యా క్యాబినెట్ సెక్రటరీ ముసలియా ముదవాడి(Musalia Mudavadi) రివీల్ చేయడం విశేషం.
'SSMB29' చిత్రం ఆఫ్రికా అడవుల నేపథ్యంలో తెరకెక్కనుంది. ఈ మూవీ షూటింగ్ ఎక్కువభాగం కెన్యాలో జరగనుంది. ఈ క్రమంలోనే రీసెంట్ గా చిత్ర నిర్మాత కె.ఎల్. నారాయణ, కుమారుడు కార్తికేయతో కలిసి.. కెన్యాలో ముసలియా ముదవాడితో సమావేశమయ్యారు రాజమౌళి. ఈ మీటింగ్ కి సంబంధించిన ఫొటోలను తాజాగా సోషల్ మీడియాలో పంచుకున్న కెన్యా క్యాబినెట్ సెక్రటరీ.. తమ దేశంలో 'SSMB29' షూటింగ్ జరగనుండటంపై సంతోషం వ్యక్తం చేశారు. ప్రపంచంలోని గొప్ప ఫిల్మ్ మేకర్స్ లో ఒకరైన రాజమౌళి రూపొందిస్తున్న సినిమా తమ దేశంలో షూటింగ్ జరుపుకోవడం ఆనందంగా ఉందని తెలిపారు. 120కి పైగా దేశాలలో విడుదల కానున్న ఈ చిత్రం.. ప్రపంచవ్యాప్తంగా ఒక బిలియన్ కంటే ఎక్కువ మంది ప్రేక్షకులను చేరువ అవుతుందని అన్నారు. ఈ సినిమా ద్వారా కెన్యా దేశం యొక్క అందం, ఆతిథ్యం ప్రపంచానికి తెలుస్తుందని ముసలియా ముదవాడి రాసుకొచ్చారు.
'SSMB29' మూవీ120కి పైగా దేశాలలో విడుదల కానుందన్న న్యూస్ ఇప్పుడు సోషల్ మీడియాని షేక్ చేస్తోంది. భారీ హాలీవుడ్ సినిమాలే వంద లోపు దేశాలలో విడుదలవుతుంటాయి. 'అవతార్' లాంటి సినిమా కూడా 80 లోపు దేశాల్లోనే విడుదలైంది. అలాంటిది, 'SSMB29' మూవీ ఏకంగా 120 దేశాల్లో విడుదల కానుందన్న వార్త సంచలనంగా మారింది. ఈ చిత్రంతో ప్రపంచ సినిమాపై రాజమౌళి బలమైన ముద్ర వేసేలా ఉన్నారు.
కాగా, 'SSMB29' ఫస్ట్ లుక్ నవంబర్ లో విడుదల కానుంది. అసలు ఈ సినిమా ఎలా ఉంటుంది? ఇందులో మహేష్ లుక్ ఎలా ఉంటుంది? అనే సస్పెన్స్ కి ఫస్ట్ లుక్ తో తెరపడనుంది.
Latest News
Video-Gossips
TeluguOne Service
Customer Service
Live Help 24/7Customer Care
Send your Queries to
