'ఆర్ఆర్ఆర్'ని ఆస్కార్స్ కి పంపకపోవడం అన్యాయం!
on Sep 22, 2022
2023 ఆస్కార్స్ కి గాను ఉత్తమ విదేశీ చిత్రం విభాగంలో ఇండియా తరపున అధికారికంగా 'ఆర్ఆర్ఆర్'ని పంపుతారని అందరూ భావించగా, ఫిల్మ్ ఫెడరేషన్ ఆఫ్ ఇండియా మాత్రం గుజరాతీ ఫిల్మ్ 'చెల్లో షో'ని ఎంపిక చేసిన సంగతి తెలిసిందే. అయితే ఈ నిర్ణయాన్ని పలువురు తప్పుబడుతున్నారు. తాజాగా తెలుగు సినీ దర్శకుల సంఘం అధ్యక్షుడు, సినీ నటుడు వై.కాశీ విశ్వనాథ్ సైతం 'ఆర్ఆర్ఆర్' సినిమాని ఆస్కార్ కి నామినేట్ చేయకపోవడం అన్యాయమని అన్నారు.
"దేశభక్తిని చాటి చెప్పే చిత్రాలు ఎన్నో వచ్చాయి. ఫిక్షన్ యాంగిల్ లో.. కల్పిత కధతో ఎంతో కష్టపడి.. ఎన్నో సంవత్సరాలు వెచ్చించి.. అద్భుతంగా తెరకెక్కించిన సినిమా 'ఆర్ఆర్ఆర్'. 'కంటెంట్' పరంగా గాని, 'సందేశం' పరంగా గాని దేశ ఖ్యాతిని ఇనుమడింప జేసే సినిమా ఇది. సీన్స్ రక్తి కట్టించడంలో గాని, నటీనటుల నుంచి పెరఫార్మెన్స్ రాబట్టుకోవడంలో గాని దర్శకులు రాజమౌళి గారు ప్రాణం పెట్టి పని చేశారు. హీరోలు జూనియర్ ఎన్టీఆర్, రామ్ చరణ్ పాత్రలలో జీవించారు. టెక్నీషియన్స్ ప్రతిభ అమోఘం. అలాంటి సినిమాని ఆస్కార్ కి నామినేట్ చేయకుండా.. 'చెల్లో షో' అనే గుజరాతీ సినిమాను నామినేట్ చేయడం.. తెలుగు చిత్రాన్ని పట్టించుకోకపోవడం.. శోచనీయం. దీన్ని ఖండిస్తూ తెలుగు దర్శకుల సంఘం అధ్యక్షుడిగా నా అసంతృప్తిని వ్యక్తం చేస్తున్నాను" అని కాశీ విశ్వనాథ్ అన్నారు.
Latest News
Video-Gossips
TeluguOne Service
Customer Service
Live Help 24/7Customer Care
Send your Queries to
