'చారి', 'దయ', 'భీమ్'.. పాత్ర ఏదైనా పరకాయప్రవేశమే
on May 20, 2022
ఈ జనరేషన్ లో కంప్లీట్ యాక్టర్ అంటే ముక్తకంఠంతో వినిపించే పేరు యంగ్ టైగర్ జూనియర్ ఎన్టీఆర్. ఆయన చేసిన సినిమాలు కొన్ని ఫ్లాప్ అయ్యాయి కానీ.. యాక్టర్ గా ఆయన ఎప్పుడూ ఫెయిల్ అవ్వలేదు. పెద్ద ఎన్టీఆర్ లాగే పాత్రల్లో పరకాయప్రవేశం చేస్తాడు జూనియర్ ఎన్టీఆర్. ఈ పాత్రలో తారక్ తప్ప మరెవరూ ఇంతలా మెప్పించరేమో అనేలా నటవిశ్వరూపం చూపిస్తాడు. ఆయన ఏదైనా పాత్ర పోషిస్తే మనకు ఎన్టీఆర్ కనిపించడు.. ఆ పాత్ర మాత్రమే కనిపిస్తుంది. ఎందుకంటే ఆయన ఎన్టీఆర్ గా నటించడు.. నటుడిగా జీవిస్తాడు. అందుకే ఆయన పోషించిన పాత్రలు మనకి అంత చేరువవుతున్నాయి.
ఈరోజు(మే 20) తారక్ పుట్టినరోజు సందర్భంగా ఇప్పటి వరకు ఆయన పోషించిన విభిన్న పాత్రలను ఒకసారి గుర్తు చేసుకుందాం.
చారి(అదుర్స్): తారక్ అంటే ముందుగా గుర్తొచ్చేది ఓ మాస్ హీరో. మాస్ లో ఆయనకు విపరీతమైన ఫాలోయింగ్ ఉంది. అలాంటి తారక్ ఓ అమాయకపు పూజారి పాత్రలో నటించి ప్రేక్షకులను పొట్ట చెక్కలయ్యేలా నవ్విస్తాడని ఎవ్వరూ ఊహించలేదు. కానీ తారక్ ఆ పని చేసి చూపించాడు. చారి పాత్రలో జీవించి, భట్టుతో కలిసి నవ్వులు పూయించి.. అందరిచేత 'అదుర్స్' అనిపించుకున్నాడు.
దయ(టెంపర్): 'నా పేరు దయ.. నాకు లేనిదే అది' అంటూ ఈ సినిమాలో తారక్ తన టెంపర్ ని చూపించాడు. 'వన్ మ్యాన్ షో' కి డెఫినేషన్ ఏంటి అంటే టెంపర్ లో తారక్ యాక్టింగ్ అని చెప్పేయొచ్చు. బ్యాడ్ పోలీస్ నుండి గుడ్ పోలీస్ గా మారే 'దయ' అనే నెగటివ్ షేడ్స్ ఉన్న క్యారెక్టర్ లో తారక్ ఒదిగిపోయాడు. పోసాని, తనికెళ్ళ భరణిలతో వచ్చే సీన్స్ తో పాటు.. కోర్ట్ సీన్ లో తారక్ యాక్టింగ్ కి ప్రేక్షకులు ఫిదా అయిపోయారు. టెంపర్ సినిమాను ఇతర బాషల్లో రీమేక్ చేసినప్పటికీ ఎవ్వరూ తారక్ యాక్టింగ్ ని మ్యాచ్ చేయడం కాదు కదా దగ్గరికి కూడా రాలేకపోయారంటే.. 'దయ'గా తారక్ ఎంత ఇంపాక్ట్ క్రియేట్ చేశాడో అర్థం చేసుకోవచ్చు.
రామకృష్ణ(రాఖీ): 'అన్న అంటే చెల్లి చేత రాఖీ కట్టించుకునే వాడే కాదు.. చెల్లికి అన్యాయం చేసిన వాడిని చంపడానికి కూడా వెనకాడడు' అని తెలియజేసిన సినిమా రాఖీ. ఈ సినిమాలో తారక్ నటన గురించి ఎంత చెప్పుకున్నా తక్కువే అవుతుంది. ఆడవారికి అన్నలా అండగా ఉంటూ.. చట్టాన్ని తన చేతుల్లోకి తీసుకొని, మనుషుల రూపంలో ఉన్న మృగాలను శిక్షించే పాత్రలో తారక్ జీవించాడు. క్లైమాక్స్ లో వచ్చే కోర్ట్ సీన్ లో తారక్ చెప్పే భారీ డైలాగ్ కి ఎవరైనా కన్నీళ్లు పెట్టుకోవాల్సిందే. అంత పెద్ద డైలాగ్ ని సింగల్ టేక్ లో చెప్పి నట దిగ్గజాల చేత సైతం శభాష్ అనిపించుకున్నాడు.
యంగ్ యమ (యమదొంగ): లావుగా ఉంటాడని, లుక్స్ విషయంలో కేర్ తీసుకోడని వచ్చిన విమర్శలకు 'యమదొంగ' సినిమాతో సమాధానం చెప్పాడు తారక్. ఈ మూవీలో కొత్త ఎన్టీఆర్ ని చూస్తాం. లుక్స్, డాన్స్, ఫైట్స్, యాక్టింగ్ అన్ని అదరగొట్టాడు. ముఖ్యంగా యంగ్ యమగా తన నట విశ్వరూపాన్ని చూపించాడు. సీనియర్ నటుడు మోహన్ బాబుతో పోటాపోటీగా నటించి ఔరా అనిపించుకున్నాడు. ఈ తరంలో పౌరాణిక పాత్రల్లో నటించి మెప్పించగల హీరో తానేనని నిరూపించాడు.
రావణ్ (జై లవ కుశ): నటుడిగా ఒక పాత్ర చేసి మెప్పించడమే గొప్ప అనుకుంటే.. ఒకే సినిమాలో మూడు పాత్రలు పోషించి మెప్పించడం మామూలు విషయం కాదు. కానీ తనకి మాములు విషయమే అని 'జై లవ కుశ' సినిమాతో తారక్ నిరూపించాడు. ముఖ్యంగా నెగటివ్ షేడ్స్ ఉన్న రావణ్(జై) పాత్రలో ఆయన జీవించిన విధానం ప్రశంసల వర్షం కురిసేలా చేసింది. కేవలం తన నటన కోసమే ప్రేక్షకులు మళ్ళీ మళ్ళీ మూవీని చూసేలా చేసింది.
భీమ్(ఆర్ఆర్ఆర్): ఆర్ఆర్ఆర్ కి ముందు వరకు తారక్ ఎంత గొప్ప నటుడో మనకి మాత్రమే తెలుసు. ఇప్పుడు తారక్ నట విశ్వరూపం గురించి దేశం మొత్తం తెలిసింది. కళ్ళతో ఇన్ని భావాలు పలికించడం ఎలా సాధ్యమని అందరూ ఆశ్చర్యపోయేలా నటించాడు. భీమ్ పాత్రలో తనని తప్ప ఎవరినీ ఊహించుకోలేనంతగా జీవించాడు. ఒకే షాట్ లో బాధ, కోపం చూపించడం తనకి మాత్రమే సాధ్యం అనుకునేలా నటించి మెప్పించాడు. ఆర్ఆర్ఆర్ సినిమా అంతా ఒకెత్తు అయితే, అందులో కొమురం భీముడో సాంగ్ మరో ఎత్తు. ఆ సాంగ్ లో తారక్ నటన గురించి ఎంత చెప్పినా తక్కువే. అందులో తారక్ నటనకి దేశవ్యాప్తంగా ఉన్న సినీ ప్రేక్షకులు ఫిదా అయ్యారు.
ఇలా తారక్ ఏ పాత్ర పోషించినా అందులో ఒదిగిపోతాడు. 20 ఏళ్ళకే ఆది, సింహాద్రి వంటి సినిమాల్లో పవర్ ఫుల్ రోల్స్ లో నటించి మెప్పించాడు. తన యాక్టింగ్, డాన్స్, డైలాగ్స్ తో మాస్ ని ఉర్రూతలూగించాడు. 'నాన్నకు ప్రేమతో' సినిమాలో ఆఖరి క్షణాల్లో తండ్రి కళ్ళల్లో ఆనందం చూడటం కోసం పరితపించే కొడుకు పాత్రలో నటించిన తారక్ కన్నీళ్ళు తెప్పించాడు. 'బృందావనం'లో లవర్ బాయ్ పాత్రలో అల్లరి చేశాడు. జనతా గ్యారేజ్ లో బాధ్యత గల యువకుడి పాత్రలో మెప్పించాడు. ఇక 'అరవింద సమేత'లో అయితే తండ్రి చనిపోయిన బాధని కళ్ళలో చూపిస్తూ సినిమా అంతా క్యారీ చేశాడు. అదే మూవీలో ఒక సీన్ లో అయితే ఫోనులో వార్నింగ్ ఇచ్చి.. కేవలం స్వరంతో చావు భయం కలిగించవచ్చా!? అని అందరూ ఆశ్చర్యపడేలా చేశాడు.
Also Read