ఆడు పోయాడ్రా బుజ్జి
on Dec 7, 2013
"అతడు" సినిమాలో మహేష్ ను "ఆడు మగాడ్రా బుజ్జి" అని అంటే ఆ డైలాగ్ సూపర్ హిట్టయింది. అదే డైలాగ్ పేరుతో మహేష్ బావ సుధీర్ హీరోగా తెరకెక్కింది. ఈ సినిమా నేడే విడుదలైంది. ఎప్పుడు లేని విధంగా సుధీర్ కొత్తగా ఇందులో పెద్ద ప్రయత్నమే చేసాడనిపిస్తుంది. సినిమా విడుదలైన క్షణం నుండి ఇప్పటివరకు సరైన టాక్ ను దక్కించుకోలేదు.
"ప్రేమకథాచిత్రం" వంటి హిట్ చిత్రం తర్వాత సుధీర్ నటించిన ఈ "ఆడు మగాడ్రా బుజ్జి" సినిమాపై భారీ అంచనాలే ఏర్పడ్డాయి. పైగా దీనికితోడూ సుధీర్ సిక్స్ ప్యాక్ బాడీని ఈ సినిమాలోనే చూపించడం మరింత హైప్ ను క్రియేట్ చేసింది. ఫ్యామిలీ, యాక్షన్ ఎంటర్ టైనర్ అని ముందు నుంచి చెప్తున్నా కూడా యాక్షన్ మాత్రమే చూపేంటి జనాలను థియేటర్ లోనే చావుదెబ్బలు కొట్టినంత పనిచేసింది ఈ సినిమా.
హీరోయిన్ అస్మితా ఈ సినిమాకు ఎలాంటి ప్లస్ అవకపోగా.. కొన్ని సన్నివేశాలలో అసలు ఈమె లేకున్నా బెటర్ గా ఉండేది అనే ఫీలింగ్ వచ్చేసింది. పూనమ్ తన పాత్రకు ఎదో న్యాయం చేసే ప్రయత్నం చేసింది. వరుసకు బావ అయ్యే నరేష్ ఇందులో సుధీర్ కు తండ్రి పాత్రలో నటించేసాడు. కానీ నరేష్, సుమన్ వంటి కొంత మంది తారాగణం వారి వారి పాత్రలకు న్యాయం చేయగలిగారు.
ఈ సినిమాలో సుధీర్ నటన, డాన్సులు, సిక్స్ ప్యాక్ బాడీ బాగున్నాయి. పాటలు పరవాలేదనిపించింది. స్క్రీన్ ప్లే, డైరెక్షన్ పూర్తిగా ఫెయిల్ అయ్యింది. మొత్తానికి ఈ సినిమా అనుకున్న స్థాయిలో లేకపోవడంతో అభిమానులు తీవ్ర నిరాశ చెందుతున్నారు.