దర్శకుడు నాగ్ అశ్విన్ రూపొందించిన 'మహానటి' సినిమాలో కీర్తి సురేష్ ప్రధాన పాత్ర పోషించిన సంగతి తెలిసిందే. ఈ సినిమాలో 'ఒక కంటితో కన్నీళ్లు' సీన్ అందరికీ గుర్తు ఉండే ఉంటుంది. గ్లిజరిన్ వాడకుండా ఎడమ కంటి నుండి షాట్ టైమ్ కి రెండు కన్నీళ్ల బొట్లు రావాలి. ఆ సీన్ లో సావిత్రి నటన చూసిన డైరెక్ట‌ర్ కేవీ రెడ్డి మైమరిచిపోతారు. అయితే ఇప్పుడు ఇదే మాదిరిగా ఒక కంటిలో నుండి కన్నీళ్లు రప్పించి బుల్లితెర ప్రేక్షకులను మెస్మరైజ్ చేసింది వంటలక్క. 

'కార్తీక దీపం' సీరియల్ లో వంటలక్కకి ఎంతమంది ఫ్యాన్స్ ఉన్నారో తెలిసిందే. సీన్ పండాలంటే వంటలక్క ఉండాల్సిందేనని అంటారు అభిమానులు. తన కనురెప్పలతో బెదిరించడమే కాకుండా.. హావభావాలతో ప్రేక్షకుల కళ్లనిండా నీళ్లు తెప్పించేస్తుంది వంటలక్క. గత వారం రోజులుగా ఈ సీరియల్ చాలా ఎమోషనల్ గా సాగుతుంది. వంటలక్క చనిపోతుందనే విషయం సీరియల్ లో హాట్ టాపిక్ గా మారింది. వంటలక్క తన గతాన్ని, భవిష్యత్తుని తలచుకుంటూ బాధపడుతున్న సమయంలో డాక్టర్ బాబు ధైర్యం చెబుతాడు. అతడి మాటలకు ఓ నవ్వు నవ్వి దీనంగా చూస్తూ అందరినీ ఏడిపించేసింది. 

ఆ సందర్భంలో ఓ కాంతిలో విషాదం, మరో కాంతిలో కన్నీరు అన్నట్లుగా ఎడమ కంటి నుండి కన్నీళ్లను విడిచి 'మహానటి' సావిత్రి నటనను గుర్తుచేసిందని అభిమానులు కామెంట్స్ చేస్తున్నారు. ఈ సీన్ లో వంటలక్క ఎక్స్‌ప్రెష‌న్స్‌ను క్యాప్చర్ చేసి వాటిపై మీమ్స్ క్రియేట్ చేస్తున్నారు. ఈ మీమ్స్ సోషల్ మీడియాలో వైరల్ అవుతున్నాయి.