బుల్లితెరపై యాంకర్ రవి, లాస్య అప్పట్లో సెన్సేషన్ క్రియేట్ చేశారు. 'సంథింగ్ స్పెషల్' అంటూ ఈ జంట యాంకర్లుగా చేసిన ఈ షో మంచి టీఆర్పీల‌ను రాబట్టింది. అప్పట్లో రవి, లాస్య జంటను ప్రేక్షకులు బాగా ఆదరించారు. కానీ కొన్నాళ్లకే ఇద్దరి మధ్య గొడవలు రావడం, విడిపోవడం.. ఒకరిపై మరొకరు ఆరోపణలు చేసుకోవడం వంటివి జరగడంతో ఆన్ స్క్రీన్ మీద ఈ జంట కనిపించకుండాపోయింది. అలా దాదాపు ఐదేళ్లు గడిచాయి. ఇప్పుడు మళ్లీ రవి, లాస్య జంటగా కనిపించడం మొదలుపెట్టారు.

సంక్రాంతి ఈవెంట్ నుండి ఇద్దరూ బుల్లితెరపై రచ్చ చేయడం ప్రారంభించారు. ఈవెంట్లతో పాటు కామెడీ స్టార్స్ అనే షోలో హల్చల్ చేస్తున్నారు. మునుపటికంటే మరింత జోరుతో ముందుకు వెళ్తున్నారు. రొమాంటిక్ అండ్ కామెడీ స్పూఫ్ లతో రచ్చ చేస్తున్నారు. ఈ ఇద్దరికీ ఉన్న డిమాండ్ ను కొందరు క్యాష్ చేసుకుంటున్నారు. పలు ఇంటర్వ్యూలు కండక్ట్ చేస్తూ సోషల్ మీడియాలో షేర్ చేస్తున్నారు.

తాజాగా ఆర్జే కాజల్ ఈ జంటను ఇంటర్వ్యూ చేసింది. అందులో కొన్ని ప్రశ్నలకు లాస్య చెప్పిన సమాధానాలు ఇప్పుడు వైరల్ అవుతున్నాయి. "ఏ మూడు వస్తువులు లేకపోతే రవి బతకలేడు?" అని యాంకర్ అడిగిన ప్రశ్నకు లాస్య వెరైటీగా బదులిచ్చింది. సోషల్ మీడియా, ఫోన్, శానిటైజర్ లేకపోతే రవి బతకలేడని.. మరీ ముఖ్యంగా శానిటైజర్ అయితే ఎప్పుడూ కారులోనే ఉంటుందని చెప్పింది. కరోనా రాకముందు కూడా రవి శానిటైజర్ వాడేవాడని.. ఏదైనా ముట్టుకుంటే వెంటనే శానిటైజర్ రాసుకుంటాడని చెప్పుకొచ్చింది.