‘చికుబుకు చికుబుకు రైలే..’, ‘ఆకతాయి ఒక్కడంట, రాలుగాయి ఒక్కడంట.... దొంగ దొంగ’ అంటూ ఆరేళ్ళ వయసులోనే ‘జెంటిల్‌మేన్‌’, ‘దొంగ దొంగ’ చిత్రాల్లో పాటలు పాడి అందర్నీ ఆశ్చర్యానికి గురి చేసిన జి.వి.ప్రకాష్‌ ‘వెయిల్‌’ చిత్రంతో సంగీత దర్శకుడిగా మారాడు. ప్రేమిస్తే భరత్‌ ఈ సినిమాలో హీరో. ఆ తర్వాత మ్యూజిక్‌ డైరెక్టర్‌గా చాలా మంచి పేరు తెచ్చుకున్నాడు. రజనీకాంత్‌ ‘కుసేలన్‌’ చిత్రంలో స్క్రీన్‌పై కనిపించి నటుడిగాను, సింగర్‌గానూ తనను తాను ప్రూవ్‌ చేసుకున్నాడు. ఆ తర్వాత హీరోలు పలు సినిమాలు చేశాడు. మ్యూజిక్‌ డైరెక్టర్‌గా, సింగర్‌గా, హీరోగా మంచి పేరు తెచ్చుకున్న జి.వి.ప్రకాష్‌.. ఆస్కార్‌ అవార్డ్‌ విన్నర్‌ ఎ.ఆర్‌.రెహమాన్‌ మేనల్లుడు. ఈ మల్టీ టాలెంటెడ్‌ నిర్మాతగా కూడా మారారు. ఆ వివరాల్లోకి వెళితే..

నూతన దర్శకుడు కమల్‌ ప్రకాశ్‌ను దర్శకుడిగా పరిచయం చేస్తూ జి.వి.ప్రకాష్‌ నిర్మిస్తున్న చిత్రం షూటింగ్‌ పూజా కార్యక్రమాలతో చెన్నయ్‌లో ప్రారంభమైంది. ఈ కార్యక్రమానికి కమల్‌హాసన్‌ చీఫ్‌ గెస్ట్‌గా హాజరై ముహూర్తపు సన్నివేశానికి క్లాప్‌నిచ్చారు. ఈ సినిమాలో జి.వి.ప్రకాష్‌ హీరోగా నటిస్తూ సంగీతం అందిస్తున్నారు. సముద్రం నేపథ్యంలో సాగే యాక్షన్‌ థ్రిల్లర్‌ ఇది అని దర్శకుడు కమల్‌ చెప్పారు. ‘కింగ్‌స్టన్‌’ పేరుతో రూపొందే ఈ చిత్రంలో దివ్యభారతి హీరోయిన్‌గా నటిస్తోంది. హీరోగా, సంగీత దర్శకుడిగా బిజీగా ఉన్న జి.వి.ప్రకాష్‌ ఈ సినిమాతో నిర్మాతగా మారడానికి కారణం ఏమిటని అడిగిన ప్రశ్నకు ‘కమల్‌ ప్రకాశ్‌ చెప్పిన కథ నాకు బాగా నచ్చింది. అందులో హీరో చేసే సాహస విన్యానాలు నన్ను ఎంతగానో ఇన్‌స్పైర్‌ చేశాయి. అందుకే నేనే ఈ సినిమా నిర్మించాలనుకున్నాను’’ అన్నారు.