English | Telugu
బాహుబలి రెండో పార్ట్ కు భారీ డిమాండ్..!
Updated : Apr 19, 2016
బాహుబలి మొదటి పార్ట్ సృష్టించిన ప్రభంజనం అంతా ఇంతా కాదు. సినిమా రిలీజవ్వకముందే, రాజమౌళి పబ్లిసిటీ తెలివితో ఇంటర్నేషనల్ గా పేరు తెచ్చేసుకుంది. రిలీజైన తర్వాత జరిగిన బాక్సాఫీస్ విధ్వంసం అంతా ఇంతా కాదు. రికార్డులన్నింటినీ తుత్తునియలు చేసి సరికొత్త రికార్డులను పద్ధతిగా క్రియేట్ చేసేసింది బాహుబలి సినిమా. అందుకే తర్వాత రాబోయే రెండో పార్ట్ కోసం, దేశమంతా ఆసక్తిగా ఎదురుచూస్తోంది. ఈ క్రేజ్ బాహుబలి కంక్లూజన్ డిమాండ్ ను అమాంతం పెంచేసింది. మొదటి పార్ట్ ను కరణ్ జోహార్ తన ధర్మ ప్రొడక్షన్స్ బ్యానర్ పై హిందీలో రిలీజ్ చేశాడు. రెండో పార్ట్ ను మాత్రం యశ్ రాజ్ ఫిలిమ్స్ దక్కించుకోవాలని చూస్తోంది.
ఈ మేరకు 150 కోట్లకు వరల్డ్ వైడ్ హిందీ రైట్స్, శాటిలైట్ రైట్స్ ను కొనడానికి యశ్ రాజ్ సంస్థ ముందుకొచ్చిందని బాలీవుడ్ వర్గాలంటున్నాయి. దీని బట్టే, బాహుబలికి దేశవ్యాప్తంగా ఎంత క్రేజ్ ఉందో అర్ధం చేసుకోవచ్చు. ఎట్టిపరిస్థితుల్లోనూ ఏప్రిల్ 14న సినిమాను రిలీజ్ చేయడం కోసం, జక్కన్న అండ్ కో కష్టపడుతున్నారు. ఏప్రిల్ వరకూ వేడిలో కూడా షూటింగ్ జరుపుతున్న బాహుబలి టీం మే నెలలో మాత్రం గ్యాప్ ఇచ్చి ఆ తర్వాత రెగులర్ షూటింగ్ తో అక్టోబర్లో టాకీ పార్ట్ ముగించాలని భావిస్తున్నారట. ఇక అక్కడి నుంచి, సినిమాకు ప్రాణమైన గ్రాఫిక్స్ అండ్ పోస్ట్ ప్రొడక్షన్ వర్క పై జక్కన్న దృష్టి పెట్టనున్నాడని సమాచారం.