సినిమాలో క‌థ అనే వ‌స్తువే లేక‌పోవ‌డం పెద్ద స‌మ‌స్య‌! క‌థ‌లెక్కువైనా ప్రాబ్ల‌మే! అస‌లు క‌థ‌లో ఉప్మాలా ఉప క‌థ‌లు పోటెత్తితే.. ఏది అస‌లో, ఏది కొస‌రో అర్థం కాక త‌ల‌బ‌రువెక్కుద్ది. అదెలాగో.. తెలియాలంటే కృష్ణ‌గాడి వీర ప్రేమ‌గాథ చూడాలి. నిజానికి ఇదో సింపుల్ క‌థ‌. కానీ వీలైనంత కాంప్లికేట్ చేసేసే ప్ర‌య‌త్నాలు జ‌రిగాయి. దాంతో..అస‌లు క‌థ చెట్టెక్కి కూర్చుంది. క్లైమాక్స్ వ‌ర‌కూ కింద‌కి దిగి రాలేదు. ఆ విధంబెట్టిదో తెలియాలి అనిన‌.. కృష్ణ‌గాడి వీర ప్రేమ‌గాథ లోతుల్లోకి వెళ్లాలి.

కథ:

కృష్ణ (నాని)కి చిన్నప్పట్నుంచే మహాలక్ష్మి (మెహ్రీన్)అంటే ఇష్టం. కానీ దాన్ని బ‌య‌ట‌కు చెప్ప‌లేడు.కార‌ణం.. భ‌యం. మ‌హాల‌క్ష్మిది ఫ్యాక్ష‌న్ కుటుంబం. త‌న మ‌న‌సులోని మాట బ‌య‌టకు చెప్తే ఎక్క‌డ ప్రాణాలు పోతాయో అన్న‌భ‌యం. మ‌హాల‌క్ష్మికీ... కృష్ణ అంటే ప్రాణం. అందుకే.. గుట్టుగా ప్రేమించుకొంటుంటారు. అయితే... ఈ ప్రేమ‌ను బ‌య‌ట‌పెట్టాల్సిన సంద‌ర్భం వ‌స్తుంది. `మా ఇంట్లో వాళ్ల‌కు మ‌న ప్రేమ విష‌యం చెప్ప‌కపోతే... ప్రాణాలు తీసుకొంటా` అని మ‌హాల‌క్ష్మి బెదిరిస్తుంది. దాంతో.. ఎలాగైనా రిస్క్ చేద్దామ‌నుకొంటాడు. ఇంత‌లో..మాఫియా డాన్ డేవిడ్ భాయ్ (మురళీ శర్మ) హైద‌రాబాద్‌కి వ‌స్తాడు. అత‌ని కోస‌మే ఎదురుచూస్తుంటాడు ఏసీపీ శ్రీకాంత్ (సంపత్ రాజ్). అసలు మ‌హాల‌క్ష్మి క‌థ‌కీ, వీళ్లిద్ద‌రికీ ఉన్న సంబంధం ఏమిటి? కృష్ణగాడు త‌న‌లోని వీరుడ్ని ఎలా బ‌య‌ట‌కు తీసుకొచ్చాడు అన్న‌దే.. ఈ సినిమా.

ఎనాలసిస్ :

ఓ పిరికివాడు వీరుడిలా ఎలా మారాడు? త‌న ప్రేమ‌ని ఎలా గెలిపించుకున్నాడు అన్న‌దే క‌థ‌. స్టోరీ సింపుల్‌గా ఉంది. కానీ.. దాంట్లో అనేక‌ానేక పాత్ర‌ల్ని ప్ర‌వేశ పెట్టి, ట్విస్టులు ట‌ర్న్‌ల‌తో హోరెత్తించి, ఛేజింగులు ఫైటింగులు గ‌ట్రా చేసి... క‌ల‌గాపుల‌గం చేసేశాడు. దాంతో సినిమా అంతా ఒకే థ్రెడ్‌పై సాగ‌కుండా.. ఇష్టంవ‌చ్చిన‌ట్టు నడుస్తుంది. ఏ పాత్ర ఎందుకొచ్చిందో అన్న విష‌యం కామ‌న్ ఆడియ‌న్‌కి అంత త్వ‌ర‌గా రిజిస్ట‌ర్ అవ్వ‌దు. కానీ.. కృష్ణ‌, మ‌హాల‌క్ష్మి ల‌వ్ ఎపిసోడ్ ఇంట్ర‌స్టింగ్ గా సాగుతుంది. ఆ దాగుడు మూత‌ల ప్రేమ‌క‌థ‌, మ‌ధ్య‌లో స‌త్యం రాజేష్‌ని బ‌క‌రాగా మార్చుకోవ‌డం, కృష్ణ‌గాడి పిరికిత‌నం...ఇవ‌న్నీ జనాలకు న‌చ్చుతాయి. అయితే..అందులో ఫ్యాక్ష‌న్ గోల ఎక్కువైంది. ముఠా త‌గాదాలు, న‌రుక్కోవ‌డాలూ పెరిగి.. ప్రేమ‌క‌థ‌లో ర‌క్త‌పాతం ప్ర‌వేశిస్తుంది. పిల్ల‌ల్ని కాపాడే బాధ్య‌త హీరోపై ప‌డ‌డం.. సినిమాకి కీల‌క‌మైన ఇంట్ర‌వెల్ బ్యాంగ్‌. అక్క‌డి వ‌ర‌కూ.. క‌థ బాగానే ఉన్న‌ట్టు అనిపిస్తుంది. అయితే ఆ త‌ర‌వాతే పూర్తిగా ట్రాక్ త‌ప్పుతుంది. క‌థ‌తో పాటు,.. సినిమా కూడా రోడ్డుపైన ప‌డుతుంది. పిల్ల‌ల్ని కాపాడ‌డం సీరియ‌స్ బాధ్య‌త‌. కానీ.. హీరో దాన్ని సిల్లీగా తీసుకోవ‌డం న‌చ్చ‌దు. అప్ప‌టి వ‌ర‌కూ ఏసీపీ శ్రీ‌కాంత్‌కి ఎదురే లేద‌న్న‌ట్టు చూపిస్తారు. కానీ.. త‌న పిల్ల‌ల్ని తాను కాపాడుకోలేడు. బ‌లం.. బ‌ల‌గం ఉన్నా ఆ పాత్ర‌ని డ‌మ్మీ చేసేశారు. సెకండాఫ్‌లో ఫృద్వీ పోలీస్ స్టేష‌న్ ఎపిసోడ్ త‌ప్ప‌.. ఇంకేం పేల్లేదు. హీరో హీరోయిన్ల పాత్ర‌కూ సెకండాఫ్‌లో ప్రాధాన్యం త‌గ్గిపోయింది. సినిమాని ఏదోలా న‌డిపించాల‌ని కాస్త క‌న్‌ఫ్యూజ‌న్ కామెడీనీ క‌లిపేశారు. లారీపై సాగే పాట కూడా ఇరికించేదే. క్లైమాక్స్ వ‌ర‌కూ.. నానిలో ని హీరో మేల్కోడు. దాంతో.. సెకండాఫ్ మొత్తం శిరోభారంగా మిగిలిపోతుంది.

తెలుగుఒన్ ప్రోస్పెక్టివ్:

భ‌లే భ‌లే మ‌గాడివోయ్ హ్యాంగోవ‌ర్‌లోనే నాని ఉండిపోయాడేమో అనిపిస్తుంది. అవే ఎక్స్‌ప్రెష‌న్స్ మ‌ళ్లీ రిపీట్ చేశాడు. మొత్తానికి త‌న వంతు బాధ్య‌త‌ను స‌క్ర‌మంగా నిర్వ‌హించాడ‌ు. మెహ‌రీన్ అందంగా క‌నిపించింది. అయితే.. మ‌హాల‌క్ష్మి పాత్ర‌కు అంత సూట‌బుల్ కాద‌నే చెప్పాలి. సెకండాఫ్‌లో త‌న రోల్ చాలా త‌క్కువ‌. సంపత్ రాజ్‌కి మ‌రోసారి మంచి పాత్ర ద‌క్కింది. ముర‌ళీ శ‌ర్మ‌ని డాన్‌గా చూపించి... ఆ పాత్ర‌ని చివ‌రికి క‌ట‌క‌టాల వెన‌క్కే ప‌రిమితం చేశారు. ఫృద్వీ, స‌త్యం రాజేష్‌లు కాస్త రిలీఫ్ ఇచ్చారు.

అందాల రాక్ష‌సి సినిమా ఎలా ఉన్నా.. టెక్నీషియ‌న్‌గా మంచి పేరు తెచ్చుకొన్నాడు. హ‌ను. ఈ సినిమాలో మాత్రం.. ర‌చ‌యిత‌గా పేరు రావాల‌న్న త‌ప‌న చూపించాడు. డైలాగ్స్ అక్క‌డ‌క్క‌డ బాగున్నాయి. యాక్ష‌న్ ఎపిసోడ్స్‌ని బాగానే హ్యాండిల్ చేశాడు. అయితే క‌థ విష‌యంలో ట్రాక్ త‌ప్పేశాడు. నువ్వంటే.. పాట చాలా బాగుంది. తీర్చిదిద్దిన విదాన‌మూ న‌చ్చుతుంది. మిగిలిన పాట‌ల‌న్నీ క‌థ‌కు స్పీడ్ బ్రేక‌ర్లు వేసేవే. నిడివి కూడా బాగా టూమ‌చ్‌గా ఉంది. 20 నిమిషాల సినిమా ట్రిమ్ చేసుకోవ‌చ్చు. విజువ‌ల్‌గా సినిమా బాగుంది. కానీ.. సినిమాలోనే విష‌యం లేదు.

మొత్తానికి భ‌లే భ‌లే మ‌గాడివోయ్ త‌ర‌వాత‌.. నాని నుంచి వ‌చ్చిన సినిమా కాబ‌ట్టి ఓపెనింగ్స్ బాగుండొచ్చు. కానీ లాంగ్ ర‌న్ క‌ష్ట‌మే. కృష్న‌గాడిలో వీర‌త్వ‌మూ, ప్రేమ‌త్వ‌మూ రెండూ పూర్తిగా నిల్‌.. అయిన క‌థ ఇది.

రేటింగ్‌: 2.5