English | Telugu
బిగ్ ట్విస్ట్.. సూపర్ స్టార్ సినిమా నుండి తప్పుకున్న డైరెక్టర్!
Updated : Nov 13, 2025
సూపర్ స్టార్ తో సినిమా చేయడానికి దర్శకులందరూ ఆసక్తి చూపుతారు. అలాంటిది అధికారికంగా ప్రకటించిన ఒక భారీ ప్రాజెక్ట్ నుండి డైరెక్టర్ తప్పుకునే సాహసం చేస్తాడా?. తాజాగా ఓ దర్శకుడు అదే పని చేసి షాకిచ్చాడు.
సూపర్ స్టార్ రజినీకాంత్ హీరోగా యూనివర్సల్ స్టార్ కమల్ హాసన్ నిర్మాణంలో ఒక సినిమా ప్రకటన వచ్చిన సంగతి తెలిసిందే. రజినీకాంత్ కెరీర్ లో 173వ సినిమాగా రూపొందనున్న ఈ ప్రాజెక్ట్ కి దర్శకుడిగా సుందర్ సి పేరుని కూడా ప్రకటించారు.
Also Read: ఇది నిజంగా రాజమౌళి సినిమాయేనా..?
'తలైవా 173'(Thalaivar173) వర్కింగ్ టైటిల్తో తెరకెక్కనున్న ఈ ప్రాజెక్ట్ నుండి తప్పుకుంటున్నట్లు తాజాగా దర్శకుడు సుందర్ ప్రకటించారు. ఈ నిర్ణయం తీసుకోవడానికి హృదయానికి కష్టంగా ఉన్నప్పటికీ, కొన్ని కారణాల వల్ల ఈ నిర్ణయం తీసుకోక తప్పలేదని సుందర్ తెలిపారు.
ఇతర ప్రాజెక్ట్స్ తో బిజీగా ఉండి, 'తలైవా 173'కి తగిన సమయాన్ని కేటాయించలేకనే సుందర్ తప్పుకున్నట్లు వార్తలొస్తున్నాయి. కొందరేమో స్క్రిప్ట్ విషయంలో రజినీకాంత్ సంతృప్తిగా లేరని, అందుకే సుందర్ ఈ నిర్ణయం తీసుకున్నారని అంటున్నారు.
ఇదిలా ఉంటే, 'తలైవా 173' నుండి సుందర్ సి తప్పుకోవడంతో.. ఆయన స్థానంలో దర్శకుడిగా కార్తీక్ సుబ్బరాజ్ ని తీసుకోవాలని సూపర్ స్టార్ అభిమానులు కోరుతున్నారు.