భగవద్గీతను అనుకరిస్తూ రవికుమార్ అలియాస్ బిత్తిరి సత్తి (Bithiri Sathi) చేసిన కామెడీ వీడియోపై విమర్శలు వ్యక్తమైన సంగతి తెలిసిందే. హిందూ సంఘాలు సత్తిపై మండిపడ్డాయి. రాష్ట్రీయ వానరసేన ఆయనపై కేసు కూడా నమోదు చేసింది. అంతేకాదు, రాష్ట్రీయ వానరసేనకు చెందిన ఒక సభ్యుడు బిత్తిరి సత్తికి ఫోన్ చేసి ఈ విషయంపై వివరణ కోరగా.. నేను హిందువునే, నేను ఏ తప్పు చేయలేదు అంటూ ఘాటుగా స్పందించాడు. ఈ ఆడియో క్లిప్ సోషల్ మీడియాలో వైరల్ కావడంతో.. బిత్తిరి సత్తిపై మరింత వ్యతిరేకత వ్యక్తమైంది. ఆయన క్షమాపణలు చెప్పాలని డిమాండ్లు పెరిగాయి. ఈ ఊహించని వ్యతిరేకతతో సత్తి దిగొచ్చాడు. క్షమాపణలు చెబుతూ తాజాగా ఒక వీడియోని విడుదల చేశారు.

"మనోళ్లకు సారీ" అంటూ తాజాగా బిత్తిరి సత్తి ఓ వీడియో రిలీజ్ చేశాడు. "ఈమధ్య ఒక వీడియో వైరల్ చేస్తున్నారు. అందులో వాస్తవం లేదు. నేను ఎప్పటినుంచో కామెడీ వీడియోస్ చేస్తున్నా. ఆ వీడియోలో చిన్న స్పెల్లింగ్ మిస్టేక్ అయింది. భగవద్గీతను నేనూ ఆరాధిస్తా. పారాయణం చేస్తుంటా. ప్రచారం చేస్తుంటా. నా అభిమానులు, శ్రేయోభిలాషులు, నన్ను ఇష్టపడేవాళ్లు, బంధుమిత్రులు.. నిజంగా వాళ్లకి కించపరిచినట్లు అనిపిస్తే.. తప్పకుండ క్షమించమని అడుగుతున్నా. అయితే నాకు వ్యతిరేకంగా ఉద్దేశపూర్వకంగా వీడియోలను చేసేవాళ్ళని మాత్రం ఖచ్చితంగా ఎదుర్కొంటాను." అని బిత్తిరి సత్తి చెప్పుకొచ్చాడు. అయితే ఆయన చెప్పిన సారీ మొక్కుబడిగా ఉందనే కామెంట్స్ వినిపిస్తున్నాయి.