పవన్ కళ్యాణ్ త్వరలో 'హరి హర వీరమల్లు' సినిమాతో ప్రేక్షకులను పలకరించనున్నారు. అలాగే 'ఓజీ' సెప్టెంబర్ 25న విడుదల కానుంది. ఈ రెండు సినిమాల షూటింగ్ ఇప్పటికే పూర్తి చేసిన పవన్.. తన తదుపరి చిత్రం 'ఉస్తాద్ భగత్ సింగ్'ను హరీష్ శంకర్ దర్శకత్వంలో చేస్తున్నాడు. ఇది ప్రస్తుతం షూటింగ్ దశలో ఉంది. ఈ మూడు సినిమాల తర్వాత ఇక పవన్ కళ్యాణ్ సినిమాలు చేయరని.. పూర్తిగా పాలిటిక్స్ కే పరిమితమవుతారని భావించారంతా. కానీ, అనూహ్యంగా ఆయన మరో సినిమా చేయడానికి సిద్ధమవుతున్నట్లు తెలుస్తోంది. (Pawan Kalyan)

 

సముద్రఖని దర్శకత్వంలో పవన్ కళ్యాణ్ ఓ సినిమా చేయడానికి రెడీ అవుతున్నట్లు సమాచారం. గతంలో వీరి కలయికలో 'బ్రో' అనే సినిమా వచ్చింది. ఇందులో పవన్ తో పాటు సాయి ధరమ్ తేజ్ నటించగా.. రచనలో త్రివిక్రమ్ భాగమయ్యారు. 'బ్రో' కోసం పవన్ తక్కువ రోజులే కేటాయించినప్పటికీ.. ఈ సినిమా అభిమానులను బాగానే అలరించింది. ఈ క్రమంలోనే వేగంగా పూర్తయ్యేలా మరో సినిమాను ప్లాన్ చేస్తున్నట్లు వినికిడి. పవన్ కళ్యాణ్ హీరోగా సముద్రఖని దర్శకత్వంలో రూపొందనున్న ఈ చిత్రానికి త్రివిక్రమ్ రచయితగా వ్యవహరించే అవకాశముంది. ఈ ప్రాజెక్ట్ వచ్చే ఏడాది పట్టాలెక్కే ఛాన్స్ ఉంది అంటున్నారు.