దివంగ‌త ద‌ర్శ‌క నిర్మాత విజ‌య బాపినీడు ఏది త‌ల‌పెట్టినా అది వైవిధ్యంగానే ఉంటుంది. మెగాస్టార్‌ చిరంజీవిని టైటిల్ రోల్‌లో చూపిస్తూ ఆయ‌న రూపొందించిన 'గ్యాంగ్ లీడ‌ర్' మూవీ ఇండ‌స్ట్రీ హిట్‌గా నిలిచింది. ఒకే రోజున నాలుగు ప్రాంతాల్లో ఆ సినిమా విజ‌యోత్స‌వాన్ని ఆయ‌న‌ నిర్వ‌హించారు. అలాగే ఏకంగా రెండు ల‌క్ష‌ల మంది చిరంజీవి అభిమానుల స‌మ‌క్షంలో 'బిగ్ బాస్' (1995) మూవీని ఆయ‌న ప్రారంభించారు. 'గ్యాంగ్ లీడ‌ర్‌'కు బ్లాక్‌బ‌స్ట‌ర్ మ్యూజిక్ ఇచ్చిన బ‌ప్పీల‌హిరి 'బిగ్ బాస్‌'కు కూడా సంగీతం స‌మ‌కూర్చారు. 

ఈ చిత్రంలోని పాట‌ల విషయంలో విజ‌య బాపినీడు చాలా శ్ర‌ద్ధ తీసుకున్నారు. వైవిధ్యంగా ఆ పాట‌ల‌ను చిత్రీక‌రించారు. రెండు పాట‌ల్ని ఊటీలో చిత్రీక‌రించారు. వాటిలో ఒక పాట‌ స‌గ‌భాగాన్ని చిన్నిప్ర‌కాశ్ కొరియోగ్ర‌ఫీలో తీసిన ఆయ‌న‌, మ‌రో స‌గ‌భాగాన్ని రాజు సుంద‌రం కొరియోగ్ర‌ఫీలో చిత్రీక‌రించారు. పాట చిత్రీక‌ర‌ణ‌లో వైవిధ్యం చూపించేందుకే ఆ పాట‌ను ఇద్ద‌రు కొరియోగ్రాఫ‌ర్ల‌తో తీసిన‌ట్లు అప్ప‌ట్లో ఆయ‌న చెప్పారు.

బాక్సాఫీస్ ద‌గ్గ‌ర 'బిగ్ బాస్' ఆశించిన రీతిలో ఆడ‌క‌పోయినా, పాట‌లు మాత్రం సూప‌ర్ హిట్ట‌వ‌డ‌మే కాకుండా, ఆడియో రైట్స్ అమ్మ‌కాల్లో ఆ సినిమా రికార్డ్ సృష్టించింది.