English | Telugu
బిగ్బి మనవడు.. షారుక్ కూతురు.. శ్రీదేవి కూతురు!
Updated : Aug 19, 2021
బాలీవుడ్ బడా బడా సూపర్స్టార్లు ఎవరైనా సరే తమ పిల్లలను భారీ సినిమాతో ఇండస్ట్రీకి ఇంట్రడ్యూస్ చెయ్యాలని చూస్తారు. కానీ, అందుకు భిన్నంగా డిజిటల్ ప్రాజెక్ట్తో బిగ్ బి మనవడు, బీటౌన్ బాద్షా కూతురు, అతిలోక సుందరి కుమార్తెను ఇంట్రడ్యూస్ చెయ్యాలని చూస్తున్నారా? అంటే... 'అవును' అనే సమాధానం వినబడుతోంది. అసలు వివరాల్లోకి వెళితే...
ఇంటర్నేషనల్ కామిక్ బుక్ 'ఆర్చి' ఆధారంగా ప్రముఖ హిందీ దర్శకురాలు జోయా అఖ్తర్ ఓ డిజిటల్ ప్రాజెక్ట్ చెయ్యాలని ప్లాన్ చేస్తున్నారు. అందులో బిగ్ బి అమితాబ్ బచ్చన్ మనవడు (కూతురి కుమారుడు) అగస్త్య నంద, షారుక్ ఖాన్ కూతురు సుహానా, ప్రముఖ బాలీవుడ్ నిర్మాత బోనీ కపూర్, అతిలోక సుందరి శ్రీదేవి దంపతుల రెండో కుమార్తె ఖుషి కపూర్ నటిస్తున్నారని బాలీవుడ్ న్యూస్.
షారుక్ కుమార్తె సుహానాను జోయా అఖ్తర్ పరిచయం చేస్తున్నారని రెండుమూడు రోజులుగా బాలీవుడ్ కోడై కూస్తోంది. సుహానా మాత్రమే కాదు, అగస్త్య నంద, ఖుషి కపూర్ ను ఇంట్రడ్యూస్ చేసే బాధ్యతను జోయా తీసుకున్నారట. ఆర్చి పాత్రలో అగస్త్య, బెట్టిగా సుహానా, వేరోనికాగా ఖుషి కనిపిస్తారట.