అశ్లీల చిత్రాల‌ను రూపొందించి, వాటిని కొన్ని యాప్‌ల ద్వారా ప‌బ్లిష్ చేస్తున్నార‌నే కేసులో సోమవారం రాత్రి (జూలై 19) ముంబై పోలీసులకు చెందిన‌ క్రైమ్ బ్రాంచ్ అరెస్టు చేయడంతో వ్యాపారవేత్త, నటి శిల్పా శెట్టి భర్త రాజ్ కుంద్రా వార్త‌ల్లోకెక్కాడు. ఈ కేసులో రాజ్‌ను 'కీల‌క‌ కుట్రదారు'గా పోలీసులు పేర్కొన్నారు. ముంబై పోలీస్ క‌మిష‌న‌ర్‌ ఒక పత్రికా ప్రకటనలో, "అశ్లీల చిత్రాలను రూపొందించి, కొన్ని యాప్స్ ద్వారా వాటిని ప‌బ్లిష్ చేయ‌డంపై ఫిబ్రవరి 2021లో ముంబై క్రైమ్ బ్రాంచ్‌లో కేసు నమోదైంది. ఈ కేసులో మేం మిస్టర్ రాజ్ కుంద్రాను జూలై 19 రాత్రి అరెస్టు చేశాం. అతను ఈ కేసులో ప్ర‌ధాన‌ కుట్రదారుడిగా కనిపిస్తున్నాడు. దీనికి సంబంధించి మా ద‌గ్గ‌ర‌ తగిన ఆధారాలు ఉన్నాయి. దర్యాప్తు పురోగతిలో ఉంది." అని వెల్ల‌డించారు.

ఈ కేసులో లేటెస్ట్ డెవ‌ల‌ప్‌మెంట్స్‌లో భాగంగా యుకెకు చెందిన కెన్రిన్ ప్రొడ‌క్ష‌న్ హౌస్ అనే కంపెనీని న‌డుపుతూ అక్క‌డే నివాసం ఉంటున్న ప్ర‌దీప్ బ‌క్షి అనే వ్యాపార‌వేత్త‌కు రాజ్ కుంద్రా బంధువు అని క్రైమ్ బ్రాంచ్ వర్గాలు వెల్లడించాయి. ఈ సంస్థకు ఛైర్మన్‌గా ఉండటంతో పాటు, రాజ్ కుంద్రా వ్యాపార భాగస్వామిగా కూడా బ‌క్షి వ్య‌వ‌హ‌రిస్తున్నాడు.

పోర్నోగ్రాఫిక్ ఫిలిమ్స్‌కు సంబంధించిన లావాదేవీలు ఎలా జరిగాయో బ‌క్షి, కుంద్రా మ‌ధ్య వాట్సాప్ చాట్లు వెల్ల‌డించాయి. లీకైన ఈ సంభాష‌ణ‌ల ద్వారా పెద్ద మొత్తంలో వారు డ‌బ్బు సంపాదించిన‌ట్లు బ‌య‌ట‌ప‌డింది. రిపోర్ట్స్ ప్ర‌కారం రాజ్ కుంద్రా ప‌రోక్షంగా కెన్రిన్ ప్రొడ‌క్ష‌న్ హౌస్ య‌జ‌మాని, పెట్టుబ‌డిదారుడు. భార‌త్‌లో ఆ సంస్థ ప్ర‌తినిధిగా కుంద్రా మాజీ పీఏ ఉమేశ్ కామ‌త్ ప‌నిచేశాడు. ఈ కంపెనీ అశ్లీల చిత్రాల నిర్మాణం కోసం కొంత‌మంది ఏజెంట్ల‌కు కాంట్రాక్టులు ఇచ్చింది.

కెన్రిన్ ప్రొడ‌క్ష‌న్ హౌస్ కింద మోడ‌ల్‌-న‌టి గెహ‌నా వ‌శిష్ట్‌, ఉమేశ్ కామ‌త్ అశ్లీల చిత్రాల్ని తీశారు. భిన్న ర‌కాల‌ పోర్న్ ఫిలిమ్స్ తీయ‌డానికి ఈ కంపెనీ వారికి అడ్వాన్స్‌గా డ‌బ్బును చెల్లించింది. ఈ చిత్రాల్ని హాట్‌షాట్ అనే సోష‌ల్ మీడియా యాప్‌లో అప్‌లోడ్ చేశారు. ద‌ర్యాప్తులో దేశవ్యాప్తంగా ప‌లు ర‌కాల ఏజెంట్ల ద్వారా ఈ కంపెనీ పోర్నోగ్ర‌ఫీకి నిధులు అంద‌జేయ‌డంతో పాటు పోర్నోగ్ర‌ఫీ బిజినెస్ జ‌రుపుతూ వ‌చ్చింద‌ని తేలింది.