నిన్న మనిషి...
సమానత్వానికి...సద్బుద్ధికి...
సద్దర్మానికి...సద్భావనకు...సహనానికి...
"సంస్కారానికి ఓ సంతకం"
కానీ...నేడు కుసంస్కారకుబుసం
తొడుక్కున్న "క్రూరమైన కులసర్పం"
ఔను"మనిషన్నవాడు మాయమౌతున్నాడు"
"మానవ మృగంగా" మారిపోతున్నాడు
నిన్న మనిషి...
నీతికి నిజాయితీకి...
నిస్వార్థానికి నిలువెత్తు నిదర్శనం...కానీ
నేడు స్వార్థమే...జీవితపరమార్థమంటూ
"అవినీతి ఊబిలో" కూరుకుపోయి
"బావిలో కప్పలా" బ్రతుకుతున్నాడు
ఔను"మనిషన్నవాడు మాయమౌతున్నాడు"
ఎందుకో "మరుగుజ్జుగా" మారిపోతున్నాడు
నిన్నమనిషి... సర్వమతాలొక్కటన్న"సంస్కారి"...
నేడు"కులం కుంపట్లను"రాజేస్తున్నాడు
మతం పేర"మారణహోమం"సృష్టిస్తున్నాడు
ఔను"మనిషన్నవాడు మాయమౌతున్నాడు"
"ఉన్మాదిగా ఉగ్రవాదిగా"మారిపోతున్నాడు
నిన్న మనిషి...
మంచితనానికి...మానవత్వానికి
"పచ్చనిప్రేమకు ప్రతిరూపం"
నేడు అసూయాద్వేషాలకు
నిలయమైన "ఆత్మబంధువు"
పగప్రతీకారాలతో రగిలిపోతున్న"రాబందువు" ఔను
"మనిషన్నవాడు మాయమౌతున్నాడు "
"మచ్చలపులిగా"మారిపోతున్నాడు"
"మానవత్వం"పరిమళిస్తే మనిషే కదా దైవం
 |